Самарқанд шаҳридаги 64-ихтисослаштирилган мактаб-интернати ўқувчиси 2005 йилда туғилган А.Т. 25 июль куни ўз жонига қасд қилган. Сирдарё вилояти Гулистон туманида истиқомат қилган А.Т. интернатга 2019 йилнинг январь ойида Сирдарё вилояти Гулистон тумани судининг майда ўғирлик, дайдилик бўйича қўйилган айби билан келтирилган.
Мактаб маъмуриятининг «Дарё»га маълум қилишича, воқеа содир бўлган кечаси тарбиячилар Низомиддин Шаманов, Феруз Болиев ҳамда Рамз Ридванов навбатчилик қилишган. Махсус мактаб интернатидаги кузатув камерасида ёзиб олинган видеотасвирда А.Т. ота-оналар учун ажратилган хонага жуда тезлик билан кириб кетганлиги қайд этилган.
Коридорни айланиб юрган тарбиячи орадан 5 дақиқа ўтгандан сўнг уни осилган ҳолда кўриб қолган ва шерикларини ёрдамга чақириб ипни ечиб олишган. Тезда машинага солиб «тез ёрдам»га олиб келинаётган вақтда йўлда жон берган.
Махсус мактаб интернати маъмурияти тақдим этган маълумотга кўра, А.Т. сурункали равишда уйдагиларини соғинаётганлигини, ота-онаси уни кўргани келишмаётганлигини айтиб тушкун кайфиятда юрган. Бир-икки марта ўз жонига қасд қилишга шаъма қилган. У билан интернат маънавий-маърифий ишлар бўйича ўринбосари Ғайбуллаев Фазлиддин, психолог Феруза Ярлақабова, ёшлар Иттифоқи етакчиси Бобур Тўраев якка суҳбат олиб боришган.
Ўтказилган тадбирларда доимо иштирок этиб, бир неча маротаба «Фахрий ёрлиқ» билан тақдирланган. Бундан ташқари А.Т. билан суҳбатлашиш учун вилоят мослашув марказидан психолог Дилрабо Давронова таклиф этилган. Директор ўринбосари Фазлиддин Ғайбуллаев боланинг онаси билан А.Т.даги ўзгаришлар тўғрисида телефон орқали гаплашиб, интернатга келишини сўраган. Лекин марҳумнинг онаси рад жавобини олган.
Воқеа содир бўлган кечаси Самарқанд шаҳар прокуратураси, Ички ишлар бўлими томонидан дастлабки суриштирув ишлари олиб борилди. Бундан ташқари вилоят Халқ таълими ходимлари ҳам вазиятни ўрганиб чиқишди дейилади хабарда.
Ҳозирда шаҳар прокуратураси томонидан тергов-суриштирув ишлари олиб борилмоқда.
Изоҳ (0)