Andijon viloyati Yuksalish qishlog‘ida tug‘ilgan 3 yoshli Xusan o‘tgan haftada “Bola yuragini qutqaring” (SACH) xayriya tashkiloti hamkorligida Isroilning “Volfson” tibbiyot markazida jarrohlik amaliyoti muvaffaqqiyatli o‘tkazilgan o‘zbekistonlik birinchi bola bo‘ldi.
Isroilning O‘zbekistondagi elchixonasi matbuot xizmati xabar berishicha, bola va unga hamrohlik qilgan onasining Isroilga parvoz qilishi, shifoxonaga joylashtirilishi, u yerda yashashi va reabilitatsiya davri bilan bog‘liq bo‘lgan barcha xarajatlar “Bola yuragini qutqaring” jamg‘armasi tomonidan qoplangan.
“Bola yuragini qutqaring” Isroil xalqaro xayriya tashkiloti bo‘lib, u dini yoki millatidan qat’iy nazar dunyoning ko‘plab mamlakatlaridagi bolalarda uchraydigan yurak xastaliklarini davolash va ularning keyingi tibbiy parvarishini ta’minlash bilan shug‘ullanadi.
SACH tashkiloti 1995-yili tashkil topgan bo‘lib, o‘tgan davr mobaynida tashkilot dunyoning 60 ta mamlakatidan bo‘lgan, ja’mi 5000 bolaning hayotini saqlab qolgan va ko‘plab mamlakatlarda faoliyat yuritayotgan 120 dan ortiq tibbiy guruhlarni tayyorlashga erishgan.
Isroilning O‘zbekistondagi elchixonasi Sog‘liqni saqlash vazirligi bilan birgalikda “Bola yuragini qutqaring” tashkiloti vakillarining shu yili O‘zbekistonga tashrifini uyushtirish bilan shug‘ullanmoqda.
Izoh (0)