Электр энергиясидан ноқонуний фойдаланган тадбиркор таъминотчи корхонага 150 миллион сўмдан ортиқ зарар келтирди. Бу ҳақда «Дарё»га МИБ Қашқадарё вилояти бошқармаси матбуот хизмати хабар бермоқда.
Маълум қилинишича, МИБ Қашқадарё вилояти бошқармаси тезкор ходимлари томонидан 2019 йилнинг 30 июнь санасида «Ислом Мухтор ҳамкор» МЧЖга қарашли «Шаршара» ресторани тегишли тартибда кўрикдан ўтказилган. Кўрик жараёнида «CЕ 303» русумли электр энергияси сарфини ҳисоблаш ускунасига 50–60 кВт қувватли истеъмол қурилмалари ўрнатилган бўлса-да, ҳисоблагич кўрсаткичи 2 соат давомида ўзгармаганли аниқланган. Шундан сўнг, электр энергияси сарфини ҳисоблаш ускунасининг соз ёки носозлиги, ички механизмига масофавий бошқариш қурилмаси (пульт) ўрнатилган ёки ўрнатилмаганлигини аниқлаш мақсадида Бюро тезкор ходимлари томонидан таъминотчи корхона вакиллари ва истеъмолчи иштирокида далолатнома тузилиб, ҳисоблаш ускунаси ечиб олинади.
Электр энергияси сарфини ҳисоблаш ускунасини ишлаб чиқарувчисидан олинган текшириш хулосасига кўра, электр ҳисоблагичнинг электрон муҳри қасддан бузилганлиги, ҳисоб схемаси фазаларига қўшимча қўлбола қурилма ўрнатилганлиги маълум бўлди. Шунга асосан, «Ўзэнергоинспекция» Қашқадарё вилояти ҳудудий бўлими ва «Қашқадарё ҳудудий электр тармоқлари» АЖлар тадбиркорнинг 150 миллион 522 минг 250 сўм зарар етказганлиги тўғрисида хулоса берган.
Мазкур ҳолат юзасидан терговга қадар суриштирув ҳаракатлари олиб борилмоқда.
Изоҳ (0)