“Azon.uz” portali “Rasululloh sollallohu alayhi va sallamning buyukliklaridagi sirlardan lavhalar” kitobida Muhammad payg‘ambar (s.a.v.)ning tashqi ko‘rinishlaridagi mukammallik haqida keltirilgan misollar bilan bo‘lishdi.
Sahobalar Payg‘ambar sollallohu alayhi va sallamni shu darajada vasflaganlarki, go‘yo siz U zotni ko‘rib turganday bo‘lasiz. U zotning yuzlari, yanoqlari, ikki ko‘zlari, qovoqlari, burunlari, bo‘yinlari, boshlari, peshanalari, og‘izlari, tishlari, ikki yelkalari, ikki kaftlari, ikki oyoqlari va boshqa a’zolari qanday bo‘lganini o‘ta aniqlik bilan bayon etishgan.
Bunga misol qilib Baro roziyallohu anhuning so‘zlarini keltirishimiz mumkin: “Rasululloh sollallohu alayhi va sallam ikki yelkalarining orasi keng, sochlari ikki quloqlarining yumshoq joyigacha yetadigan zot edilar. Men U zotdan go‘zal kishini ko‘rmaganman”.
Yana shunday deydi: “Rasululloh sollallohu alayhi va sallam insonlar orasida yuzlari eng chiroyli, tashqi ko‘rinishlari eng go‘zal kishi edilar. Haddan ortiq baland ham, past ham emas edilar”.
Ali roziyallohu anhu aytadi: “Rasululloh sollallohu alayhi va sallam semiz ham, yanoqlari go‘shtli ham emas, yuzlari qisman doira shaklida edi”. Abu Tufaylga: “Bizga Rasululloh sollallohu alayhi va sallam qanday bo‘lganlarini vasflab bering!” deyishdi. Shunda u: “Rasululloh sollallohu alayhi va sallam yuzlari oq va go‘zal edi”, deb javob berdi.
Qoshi ko‘zi kelishgan sohibi jamol,
Erur axloqi Qur’on sohibi kamol.
Rasululloh sollallohu alayhi va sallamning ko‘zlari keng, qovoqlari atrofidagi kipriklar uzun, qirg‘iyburun, ya’ni burun uchi bilan birga yuqori tarafi ko‘tarilgan edi.
Peshanalari keng, boshlari ozgina katta, yuzlari nurli, sochlari qop-qora, og‘izlari katta (arablar shu kabi og‘izlarni maqtaydilar), tishlari oppoq (tishlari bir tekisda, ikki tish orasidagi masofa bir xil), og‘izlaridan xushbo‘ylik taralib turar, qoshlari uzun va ingichka, ikkisi bir-biriga ulanmagan edi.
Rasululloh sollallohu alayhi va sallamning bu go‘zalliklari qayoqda-yu, U zot jirkanch ko‘rinishda tasvirlangan suratlar qayoqda! Shuning o‘zi bu rasmlarni chizgan kimsalar ulug‘ Payg‘ambar sollallohu alayhi va sallamni tanimasligi va bilmasligiga dalolat qiladi!
Anas roziyallohu anhudan rivoyat qilinadi: “Rasululloh sollallohu alayhi va sallamning kaftlaridan ko‘ra muloyim ipakni ham, debojni ham ushlamaganman, Rasululloh sollallohu alayhi va sallamning bo‘ylaridan ko‘ra xushbo‘y mushkni ham, anbarni ham hidlamaganman”.
Payg‘ambar sollallohu alayhi va sallamni ko‘rgan kishi xayolida yolg‘onchi insonning oldida emas, rostgo‘y insonning oldida turibman degan fikrga borar edi. Yahudiylarning eng katta olimi bo‘lgan Abdulloh ibn Salom shunday deydi: “Payg‘ambar sollallohu alayhi va sallam Madinaga kelganlarida U zotni ko‘rish uchun bordim. Yuzlariga qarab, bu yuz yolg‘onchi kimsaning yuzi emasligiga amin bo‘ldim.
Garchi bo‘lmasa ham bayon etguvchi belgilar,
Ul zotning ko‘rinishi berar xabarlar.
Payg‘ambar sollallohu alayhi va sallam haybatli va viqorli edilar. Ul zotning amakivachchalari Ali ibn Abu Tolib roziyallohu anhu aytadilar: “Kim Payg‘ambar sollallohu alayhi va sallamni birinchi bor ko‘rsa, U zotning haybatlaridan qo‘rqar edi”.
Amr ibn Oss roziyallohu anhu aytadi: “Men uchun Rasululloh sollallohu alayhi va sallamdan ko‘ra ham suyukli, ham hurmatli inson bo‘lmagan. U zotni hurmat qilganimdan ko‘zlarim bilan to‘yib qaray olmasdim. Biror kishi U zotni qanday ekanliklarini menga vasflab bering desa, bu qo‘limdan kelmaydi. Chunki men U zotga ko‘zlarim bilan to‘yib qaray olmaganman”.
Payg‘ambar sollallohu alayhi va sallam poklik va tozalikni yaxshi ko‘rar edilar. Tanasi, kiyimlari va sochining tozaligiga e’tibor bermagan kishini yoqtirmas edilar. U zot: “Alloh taolo go‘zal zot va go‘zallikni yaxshi ko‘radi”, deb marhamat qilganlar.
Jobir ibn Abdulloh roziyallohu anhudan rivoyat qilinadi: “Rasululloh sollallohu alayhi va sallam bizning oldimizga keldilar va sochlari to‘zigan bir kishini ko‘rib qoldilar. Shunda: “Bu kishi sochlarini tartibga solib qo‘yadigan narsa topa olmadimi?” dedilar. Kiyimlari kir bo‘lgan boshqa bir kishini ko‘rib: “Bu kishi kiyimlarini yuvish uchun suv topa olmadimi?” dedilar”.
Baro ibn Ozib roziyallohu anhu aytadi: “Rasululloh sollallohu alayhi va sallam qizil hulla kiyganlarini ko‘rdim. U zotdan ko‘ra go‘zal kishini ko‘rmaganman”.
Yuqoridagi ma’lumotlar musulmonlar o‘z payg‘ambarlarining tashqi ko‘rinishlari borasida keltirgan rivoyatlarining ba’zilari edi, xolos. Aslini olganda U zot bundan bir necha chandon oliy edilar. Payg‘ambar sollallohu alayhi va sallamning axloqlari va shamoyillariga bog‘liq kitoblardan bittasining mundarijasiga qarasangiz, roviylar U zot haqlarida biror ma’lumotni qoldirmay rivoyat qilganlariga guvoh bo‘lasiz. Umuman olganda, bu faqat birgina payg‘ambarning hayotida uchraydi. U ham bo‘lsa Muhammad sollallohu alayhi va sallam. Nima uchun? Chunki U zot payg‘ambarlarning xotamidir. Insonlar U zot haqida barcha narsani bilishlari lozim. Ana shunda U zot barcha holatlarda insonlar ergashadigan namuna bo‘ladilar.
Izoh (0)