Навоий вилоятининг Зарафшон шаҳрида тарбиячиларнинг мажбурий меҳнатга жалб этилгани ҳақидаги хабар ўз тасдиғини топмади. Бу ҳақда Мактабгача таълим вазирлиги матбуот хизматига асосланиб, «Gazeta.uz» хабар берди.
Аввалроқ, «Озодлик» бир нечта мактабгача таълим муассасалари ходимлари спорт марафонига таклиф этилгани, бироқ улар мусобақа ўрнига «Янги Зарафшон» маҳалла фуқаролар йиғини ҳудудини супуришга мажбурлангани ҳақида ёзган эди.
Тарбиячилардан бири боғча ходимлари мунтазам равишда ҳудудни тозалашга жалб этилишини маълум қилгани ҳам ёзилган.
Мактабгача таълим вазирлигининг маълумотига кўра, «Янги Зарафшон» маҳалласи шаҳар марказидан икки километр узоқликда жойлашган.
Туманда учта 1,16 ва 20-сонли мактабгача таълим муассасалари фаолият юритади.
Ушбу мактабгача таълим муассасалари ходимлари сўроқ қилинганида улар 15 июль куни ўз хизмат вазифаларини бажарганини маълум қилган. Ўша куни ҳафтанинг душанба куни эди, болаларни қаровсиз қолдириб бўлмасди, дейилади хабарда.
«Озодлик»да эълон қилинган материалда эса боғчада (рақами кўрсатилмаган) бир нафар тарбиячи қолгани ҳақида ёзилган эди.
«1,16, 20-сонли мактабгача таълим муассасаларида кузатув камералари ўрнатилган бўлиб, улардаги ёзувлар ўша куни тарбиячиларнинг иш жойида эканлигини тасдиқлайди», — дейилади хабарда.
Мактабгача таълим вазирлиги, шунингдек тизимда мактабгача таълим бўлими мудири ёрдамчиси лавозими йўқлигини ҳам таъкидлаган. «Озодлик»даги мақолада шундай лавозим ҳақида гап кетган.
Қўшимча равишда Зарафшон марказидан 40—50 километр узоқликда жойлашган мактабгача таълим муассасалари ходимлари ҳам сўроқ қилинган.
«Мурунтов» маҳалласида жойлашган 4-сонли мактабгача таълим муассасаси мудирасининг сўзларига кўра 19 июль куни унга хорижий рақамдан қўнғироқ бўлган ва вазиятни изоҳлашни сўрашган.
Худди шундай қўнғироқ 20-сонли мактабгача таълим муассасаси мудирасига ҳам бўлган. Иккала мудира ҳам 15 июль куни ходимлар мажбурий меҳнатга жалб этилмагани, улар ўша куни иш жойларида бўлганини таъкидлаган, дейилади хабарда.
«Мақолада ишлатилган суратлар ҳам ҳақиқий эмаслиги аниқланди. Зарафшонда тарбиячиларнинг мажбурий меҳнатга жалб этилганини акс эттирувчи суратлар топилмади», дейилади хабарда.
Изоҳ (0)