O‘zbekiston Kapital bozorini rivojlantirish agentligi delegatsiyasi 16-iyul kuni Nyu-Yorkdagi Kolumbiya universiteti vakillari bilan uchrashdi. Uchrashuv yakunida Kolumbiya universiteti va Kapital bozorini rivojlantirish agentligi o‘rtasida O‘zbekistonning moliyaviy-iqtisodiy sohasida faoliyat yuritayotgan rahbarlarning malakasini oshirishga qaratilgan ta’lim dasturlarini amalga oshirish bo‘yicha memorandum imzolandi.
Dastlabki reja bo‘yicha, Nyu-Yorkdagi Kolumbiya universiteti mutaxassislari Kapital bozorini rivojlantirish agentligi bilan hamkorlikda 2019-yil kuzida Toshkent shahrida bir qator trening va seminarlar o‘tkazadi. Universitet professori Uilyam Emiki agentlik oldiga qo‘yilgan maqsad va vazifalarni bajarish uchun ta’lim dasturlarini ishlab chiqishda akademik ko‘mak ko‘rsatishga tayyorligini bildirgan.
Ma’lumot uchun, Nyu-Yorkdagi Kolumbiya universiteti — AQShning eng ko‘hna universitetlaridan biri bo‘lib, 1754-yilda tashkil etilgan, u Ivy League’ni tashkil etuvchi Amerikaning sakkiz universitetidan biri hisoblanadi. Universitet bitiruvchilari orasida ko‘plab taniqli olimlar, davlat va siyosat arboblari, jumladan, AQShning uchta prezidenti, 96 nafar Nobel mukofoti sohiblari va 29 ta boshqa davlat rahbarlari bor.
Izoh (0)