Andijonda ichki ishlar organlari tomonidan “Namunali hudud” tajribasi doirasida qator ishlar amalga oshirib kelinmoqda. Bu haqda “Daryo”ga viloyat IIB matbuot xizmati ma’lum qildi.
Shu yil 15-iyul kuni tungi soat 23:00 atrofida Andijon shahrining 3-kichik dahasida joylashgan kafelarning birida Andijon tumanida yashovchi fuqaro J.J. kafe ishchisi S.O‘. bilan o‘zaro janjallashib, yonidagi pichoq bilan unga tan jarohati yetkazmoqchi bo‘lgan vaqtda Andijon shahar IIO FMB 1-sonli IIB profilaktika inspektori O‘.Hakimov, uning jamoat tartibini saqlash bo‘yicha yordamchisi Sh. Xudoyberdiyev hamda fidokor yoshlar guruhi a’zosi tomonidan pichoq tortib olinib, sodir etilishi mumkin bo‘lgan og‘ir jinoyatga chek qo‘yildi.
16-iyul tungi soat 02:50 larda Andijon shahridagi “Uysozlar” ko‘chasi bo‘ylab harakatlanib, o‘zini shubhali tutgan noma’lum kishining shaxsiga oydinlik kiritish maqsadida shu xududda tungi xizmatda bo‘lgan profilaktika inspektori D. Abdurahimov va yordamchisi S.Shamshiddinov tomonidan to‘xtatilganda, u IIB xodimlarining qonuniy talablariga bo‘ysunmay, bozor ichiga qochib berkingan.
U profilaktika inspektori va uning jamoat tartibini saqlash bo‘yicha yordamchisi tomonidan tezkorlik bilan ushlanib, 2-sonli IIB filtratsiya guruhiga olib kelib topshirilgan.
Olib kelingan fuqaroning shaxsiga oydinlik kiritilganida, u Andijon tumani, No‘xatak mahallasida yashovchi Sh.T. ekanligi ma’lum bo‘ldi. Uning yonida 1 dona yog‘och sopli tesha, oq rezina qo‘lqop, 2 dona qora rangli yuz niqobi borligi aniqlangan.
Tezkor surishtiruv ishlari davomida T.Sh. tanishi N.O. bilan Andijon shahridagi “Jahon savdo kompleksi” AJ hududida o‘g‘irlik qilish maqsadida kelgani ma’lum bo‘lgan. Hozirda ularning ikkisi ham ushlanib, surishtiruv ishlari davom ettirilmoqda.
Izoh (0)