Ўзбекистон Капитал бозорини ривожлантириш агентлиги делегацияси 16 июль куни Нью-Йоркдаги Колумбия университети вакиллари билан учрашди. Учрашув якунида Колумбия университети ва Капитал бозорини ривожлантириш агентлиги ўртасида Ўзбекистоннинг молиявий-иқтисодий соҳасида фаолият юритаётган раҳбарларнинг малакасини оширишга қаратилган таълим дастурларини амалга ошириш бўйича меморандум имзоланди.
Дастлабки режа бўйича, Нью-Йоркдаги Колумбия университети мутахассислари Капитал бозорини ривожлантириш агентлиги билан ҳамкорликда 2019 йил кузида Тошкент шаҳрида бир қатор тренинг ва семинарлар ўтказади. Университет профессори Уильям Эмики агентлик олдига қўйилган мақсад ва вазифаларни бажариш учун таълим дастурларини ишлаб чиқишда академик кўмак кўрсатишга тайёрлигини билдирган.
Маълумот учун, Нью-Йоркдаги Колумбия университети — АҚШнинг энг кўҳна университетларидан бири бўлиб, 1754 йилда ташкил этилган, у Ivy League’ни ташкил этувчи Американинг саккиз университетидан бири ҳисобланади. Университет битирувчилари орасида кўплаб таниқли олимлар, давлат ва сиёсат арбоблари, жумладан, АҚШнинг учта президенти, 96 нафар Нобель мукофоти соҳиблари ва 29 та бошқа давлат раҳбарлари бор.
Изоҳ (0)