Toshkentdagi mas’uliyati cheklangan jamiyatlarning birida dispetcher-operator vazifasida ishlab yurgan Alibek Alixonov (ism-familiyalar o‘zgartirilgan) Rustam Muhiddinov xonadoniga internet tarmog‘ini sozlab berish taklifi bilan bordi. Bu haqda O‘zA xabar berdi.
Fuqaroning iltimosi bilan o‘ziga tegishli uyali telefoniga ulangan “Payme” dasturi orqali Rustam Muhiddinov nomidagi plastik karta hisobidan oylik internet xizmati uchun pul to‘lovini o‘tkazib bergan. Shundan so‘ng uning plastik kartochkasi maxfiy kod raqamini telefonida saqlab qolib, keyinchalik undan foydalanib, kompyuter tizimiga ruxsatsiz kirgan.
Uch oy davomida Rustam Muhiddinov nomiga rasmiylashtirilgan plastik kartochkadan o‘zining plastik kartochkasiga pul mablag‘larini yashirin ravishda o‘tkazib, shaxsiy ehtiyojlari uchun sarflab yuborgan.
A.Alixonov 44 marta, jami 3 million so‘mdan ziyod pul mablag‘larini o‘tkazib olgan. Rustam Muhiddinov plastigidagi pullar o‘z-o‘zidan kamayib ketayotgani uchun bankka borib uchrashgan va haqiqat shunda oshkor bo‘lgan. Bu jinoyat bankdagi kartalar tekshiruvi jarayonida ma’lum bo‘ldi.
Sud Alixonovning o‘g‘rilik, ya’ni o‘zganing mol-mulkini yashirin talon-taroj qilishda ifodalangan harakatlari uchun aybli deb topdi va unga 5 yil ozodlikdan mahrum qilish jazosini tayinladi. Shuningdek, 1 yil sinov muddati belgilandi.
Izoh (0)