Тошкентдаги масъулияти чекланган жамиятларнинг бирида диспетчер-оператор вазифасида ишлаб юрган Алибек Алихонов (исм-фамилиялар ўзгартирилган) Рустам Муҳиддинов хонадонига интернет тармоғини созлаб бериш таклифи билан борди. Бу ҳақда ЎзА хабар берди.
Фуқаронинг илтимоси билан ўзига тегишли уяли телефонига уланган «Payme» дастури орқали Рустам Муҳиддинов номидаги пластик карта ҳисобидан ойлик интернет хизмати учун пул тўловини ўтказиб берган. Шундан сўнг унинг пластик карточкаси махфий код рақамини телефонида сақлаб қолиб, кейинчалик ундан фойдаланиб, компьютер тизимига рухсатсиз кирган.
Уч ой давомида Рустам Муҳиддинов номига расмийлаштирилган пластик карточкадан ўзининг пластик карточкасига пул маблағларини яширин равишда ўтказиб, шахсий эҳтиёжлари учун сарфлаб юборган.
А.Алихонов 44 марта, жами 3 миллион сўмдан зиёд пул маблағларини ўтказиб олган. Рустам Муҳиддинов пластигидаги пуллар ўз-ўзидан камайиб кетаётгани учун банкка бориб учрашган ва ҳақиқат шунда ошкор бўлган. Бу жиноят банкдаги карталар текшируви жараёнида маълум бўлди.
Суд Алихоновнинг ўғрилик, яъни ўзганинг мол-мулкини яширин талон-тарож қилишда ифодаланган ҳаракатлари учун айбли деб топди ва унга 5 йил озодликдан маҳрум қилиш жазосини тайинлади. Шунингдек, 1 йил синов муддати белгиланди.
Изоҳ (0)