Rossiyaning “Tatneft” kompaniyasi O‘zbekistondagi ilk AYoQShini ishga tushirdi

Rossiyaning “Tatneft” kompaniyasi O‘zbekistondagi ilk avtomobillarga yonilg‘i quyish shoxobchasini ishga tushirdi. Bu haqda O‘zA xabar bermoqda.

Toshkent viloyatining O‘rta Chirchiq tumanida, Toshkent — Nurafshon yo‘lida bunyod etilgan mazkur AYoQSh foydalanishga topshirilishi munosabati bilan tashkil etilgan tadbirda viloyat va Nurafshon shahar hokimligi, “Tatneft” kompaniyasi mas’ullari, jamoatchilik vakillari ishtirok etdi.

Kompaniyaning mamlakatdagi ilk shoxobchasida “TANEKO” aksiyadorlik jamiyati tomonidan ishlab chiqarilgan “Ai-95“, “Ai-92“ rusumli avtobenzinlar va dizel yonilg‘isi, O‘zbekiston neftni qayta ishlash zavodlarida ishlab chiqarilgan “Ai-80“ rusumli avtobenzin, shuningdek, metan mahsulotini sotish rejalashtirilmoqda.

Haydovchi va yo‘lovchilarga qo‘shimcha qulaylik yaratish maqsadida zamonaviy kutish zali, savdo markazi qurilib, avtomobillarni yuvish, shinalarini damlash uchun avtomatlashtirilgan texnologik qurilma o‘rnatilgan.

“Tatneft” kompaniyasi kelgusida mamlakatdagi chakana savdo tarmog‘ini kengaytirishni rejalashtirmoqda. Barcha tarmoqlar Rossiyadagi yetakchi kompaniyalar, jumladan, “TANEKO” neftni qayta ishlash kompleksining yuqori sifatli yonilg‘isi bilan ta’minlanadi.