Telegram’dagi “Daryo – Live” kanalida Qarshi davlat universitetidagi qabul jarayonlari bilan bog‘liq surat e’lon qilinib, unda qabulning tartibsizligi haqida so‘z borgandi. Ushbu xabarga Qarshi davlat universiteti munosabat bildirdi.
Universitet matbuot xizmati rahbari Oybek Yusupovning ma’lumot berishicha, ushbu surat qabul jarayonlarining ilk kunlarida suratga olingan bo‘lib, bu tartibsizlik va uzoq navbat DTM serverlarining ishlamay qolishi oqibatida yuzaga kelgan.
— DTM serverlaridagi nosozlik va qotib qolish holatlari bartaraf etilgach, muammo yechimini topdi, — deyiladi universitet matbuot xizmati xabarnomasida. – Endilikda bunday tartibsizliklarga yo‘l qo‘yilmaydi.
Matbuot xizmati xabariga ko‘ra, ayni kunga qadar universitet qabul komissiyasi tomonidan 45 235 nafar abituriyentning hujjatlari rasmiylashtirilgan. Qabul jarayonining oxirgi kunida ham abituriyentlarning hujjatlarini qabul qilish uchun universitetning uchta binosi ajratilgan bo‘lib, 170 nafar texnik-operatorlar faoliyat olib bormoqda.
— Abituriyentlarga yanada qulaylik yaratish maqsadida universitet Axborot resurs markazida qo‘shimcha 50 nafar texnik-operator qabul jarayonlariga jalb qilindi, — deydi universitet matbuot xizmati rahbari Oybek Yusupov. — Ish vaqti ertalab soat 6:00 dan kech soat 20:00 gacha tashkil etilgan. Kunlik hujjat qabul qilish bo‘yicha universitet respublikada yetakchi o‘rinda bo‘lib, bir kunda 6000 nafarga yaqin va undan ortiq abituriyentning hujjatlari qabul qilinmoqda. Xususan, 2019-yilning 9-iyul kunida 5511 nafar, 10-iyul kuni 6071 nafar, 11-iyul kuni 5450 nafar, 12-iyul kuni 5351 nafar abituriyentning hujjatlari qabul qilindi.
Ma’lumot o‘rnida: universitetda kunduzgi bakalavriat ta’lim shakli bo‘yicha 37 ta yo‘nalishda jami 2080 ta kvota ajratilgan, shundan 460 ta grant, 1620 tasi to‘lov-shartnoma asosida. Sirtqi ta’lim shakliga 13 ta yo‘nalishga jami 830 kvota ajratilgan bo‘lib, hammasi to‘lov-shartnoma asosida. Kirish imtihonlari 16-avgustdan 25-avgustgacha bo‘lgan muddatda o‘tkaziladi. Hujjatlar 1-iyuldan 15-iyulgacha qabul qilinadi. Magistratura ta’lim shakliga 18 ta yo‘nalishga jami 116 ta kvota ajratilgan. Shundan, 61 tasi grant asosida, 55 tasi to‘lov-shartnoma asosida. Hujjatlar 1-iyuldan 30-iyulgacha qabul qilinadi.
Izoh (0)