Қарши давлат университети «Дарё» танқидига муносабат билдирди

Telegram’даги «Дарё – Live» каналида Қарши давлат университетидаги қабул жараёнлари билан боғлиқ сурат эълон қилиниб, унда қабулнинг тартибсизлиги ҳақида сўз борганди. Ушбу хабарга Қарши давлат университети муносабат билдирди.

Университет матбуот хизмати раҳбари Ойбек Юсуповнинг маълумот беришича, ушбу сурат қабул жараёнларининг илк кунларида суратга олинган бўлиб, бу тартибсизлик ва узоқ навбат DTМ серверларининг ишламай қолиши оқибатида юзага келган.

— DTМ серверларидаги носозлик ва қотиб қолиш ҳолатлари бартараф этилгач, муаммо ечимини топди, — дейилади университет матбуот хизмати хабарномасида. – Эндиликда бундай тартибсизликларга йўл қўйилмайди.

Матбуот хизмати хабарига кўра, айни кунга қадар университет қабул комиссияси томонидан 45 235 нафар абитуриентнинг ҳужжатлари расмийлаштирилган. Қабул жараёнининг охирги кунида ҳам абитуриентларнинг ҳужжатларини қабул қилиш учун университетнинг учта биноси ажратилган бўлиб, 170 нафар техник-операторлар фаолият олиб бормоқда.

— Абитуриентларга янада қулайлик яратиш мақсадида университет Ахборот ресурс марказида қўшимча 50 нафар техник-оператор қабул жараёнларига жалб қилинди, — дейди университет матбуот хизмати раҳбари Ойбек Юсупов. — Иш вақти эрталаб соат 6:00 дан кеч соат 20:00 гача ташкил этилган. Кунлик ҳужжат қабул қилиш бўйича университет республикада етакчи ўринда бўлиб, бир кунда 6000 нафарга яқин ва ундан ортиқ абитуриентнинг ҳужжатлари қабул қилинмоқда. Хусусан, 2019 йилнинг 9 июль кунида 5511 нафар, 10 июль куни 6071 нафар, 11 июль куни 5450 нафар, 12 июль куни 5351 нафар абитуриентнинг ҳужжатлари қабул қилинди.

Маълумот ўрнида: университетда кундузги бакалавриат таълим шакли бўйича 37 та йўналишда жами 2080 та квота ажратилган, шундан 460 та грант, 1620 таси тўлов-шартнома асосида. Сиртқи таълим шаклига 13 та йўналишга жами 830 квота ажратилган бўлиб, ҳаммаси тўлов-шартнома асосида. Кириш имтиҳонлари 16 августдан 25 августгача бўлган муддатда ўтказилади. Ҳужжатлар 1 июлдан 15 июлгача қабул қилинади. Магистратура таълим шаклига 18 та йўналишга жами 116 та квота ажратилган. Шундан, 61 таси грант асосида, 55 таси тўлов-шартнома асосида. Ҳужжатлар 1 июлдан 30 июлгача қабул қилинади.