O‘zbekistondagi birinchi AES yaqinida 50 ming kishiga mo‘ljallangan atomchilar shahri quriladi, deya xabar bermoqda “Kun.uz”.
“AES qurilishi yakunlanganidan keyin 2,5 mingga yaqin yuqori malakali ish o‘rinlari yaratiladi. Asosan bu ushbu mintaqa (Jizzax viloyatining Forish tumani)dagi odamlar bo‘ladi. Atomchilar shahri tashkil qilinadi. Biz yo‘l va temiryo‘llar qurish bo‘yicha hisob-kitoblarni amalga oshirmoqdamiz”, — dedi “O‘zatom” rahbari Jo‘rabek Mirzamahmudov.
“O‘zGAShKLITI” instituti bosh direktori Yo‘ldosh Mag‘rupovning aytishicha, stansiyadagi har bir ish joyi boshqa sohalarda yana yettita ish o‘rni tashkil etilishiga olib keladi. Shu tariqa AESdagi 2,5 mingta ish o‘rni yana 17,5 mingta ish joyi yaratilishi uchun imkon beradi. Ularning oilalari hisobga olinsa, atomchilar shahrida 50 mingga yaqin odam istiqomat qiladi.
“Yaqinda Deloitte xalqaro konsalting kompaniyasi tadqiqot o‘tkazdi. Yevropada atom energetikasini rivojlantirishga sarflangan bir dollar butun iqtisodiyotning rivojlanishi uchun besh dollar beradi. Bunda respublika uchun qanday multiplikativ ta’sir borligini bir tasavvur qilib ko‘ring”, — deya ta’kidlab o‘tdi Mirzamahmudov.
Uning so‘zlariga ko‘ra, 2019-yil oxiriga qadar “Rosatom” bilan asosiy shartnomani imzolash rejalashtirilgan. Bu 2020-yildan tashqi infratuzilma va kerakli obyektlarni ustuvor sur’atlarda qurishni boshlash uchun kerak.
“Kelgusi yil oxiriga qadar biz atrof-muhitga ta’sirni baholashni yakunlaymiz. Loyiha ekologik talablarga javob berishi bo‘yicha barcha xotirjam bo‘lishi kerak. Faqat shundan keyingina maydonchaning o‘zi va AES qurilishi uchun litsenziya beriladi”, — deya qo‘shimcha qilib o‘tdi “O‘zatom” rahbari.
Izoh (0)