Ўзбекистондаги биринчи АЭС яқинида 50 минг кишига мўлжалланган атомчилар шаҳри қурилади, дея хабар бермоқда «Kun.uz».
«АЭС қурилиши якунланганидан кейин 2,5 мингга яқин юқори малакали иш ўринлари яратилади. Асосан бу ушбу минтақа (Жиззах вилоятининг Фориш тумани)даги одамлар бўлади. Атомчилар шаҳри ташкил қилинади. Биз йўл ва темирйўллар қуриш бўйича ҳисоб-китобларни амалга оширмоқдамиз», — деди «Ўзатом» раҳбари Жўрабек Мирзамаҳмудов.
«ЎзГASҳКЛITI» институти бош директори Йўлдош Мағруповнинг айтишича, станциядаги ҳар бир иш жойи бошқа соҳаларда яна еттита иш ўрни ташкил этилишига олиб келади. Шу тариқа АЭСдаги 2,5 мингта иш ўрни яна 17,5 мингта иш жойи яратилиши учун имкон беради. Уларнинг оилалари ҳисобга олинса, атомчилар шаҳрида 50 мингга яқин одам истиқомат қилади.
«Яқинда Deloitte халқаро консалтинг компанияси тадқиқот ўтказди. Европада атом энергетикасини ривожлантиришга сарфланган бир доллар бутун иқтисодиётнинг ривожланиши учун беш доллар беради. Бунда республика учун қандай мультипликатив таъсир борлигини бир тасаввур қилиб кўринг», — дея таъкидлаб ўтди Мирзамаҳмудов.
Унинг сўзларига кўра, 2019 йил охирига қадар «Росатом» билан асосий шартномани имзолаш режалаштирилган. Бу 2020 йилдан ташқи инфратузилма ва керакли объектларни устувор суръатларда қуришни бошлаш учун керак.
«Келгуси йил охирига қадар биз атроф-муҳитга таъсирни баҳолашни якунлаймиз. Лойиҳа экологик талабларга жавоб бериши бўйича барча хотиржам бўлиши керак. Фақат шундан кейингина майдончанинг ўзи ва АЭС қурилиши учун лицензия берилади», — дея қўшимча қилиб ўтди «Ўзатом» раҳбари.
Изоҳ (0)