Ўзбекистон бош вазири ўринбосари — таълим, соғлиқни сақлаш, экология, атроф-муҳитни муҳофаза қилиш, жисмоний тарбия ва спорт масалалари комплекси раҳбари Азиз Абдуҳакимов олий таълим муассасаларига ҳужжат топшириш вақтида юзага келаётган навбатларни баратараф этиш учун қандай чоралар кўрилаётгани ҳақида маълумот берди, дея хабар бермоқда «Дарё» Мусулмонбек Иброҳимов.
Бош вазир ўринбосарининг қайд этишича, қабул жараёнида иккита муаммо юзага келган ва улар зудлик билан бартараф этилган.
«Очиғини айтганда, абитуриентларнинг аризаларини ОТМларга қабул қилиш жараёнига пухта тайёргарлик кўрилди, деб ўйлагандик. Ҳужжатларни қабул қилиш жараёнини юқори савияда ўтказиш учун бир нечта комиссия тузиб, ҳар бир олий таълим муассасасининг ректори билан гаплашганмиз. Афсуски, иккита муаммога дуч келдик ва уларни тезкорлик билан ҳал қилдик. Биринчи масала — банкларга тўлов учун бўлган навбатларни олдини олиш учун тўловларни соат 07:00 дан қабул қилишни йўлга қўйдик», — деди Абдуҳакимов.
«Иккинчи — серверлардаги муаммоларни ҳам кўриб чиқдик. Режа бўйича DTМ серверларига кунига кўпи билан 70—80 минг ариза бўйича сўров келиши тахмин қилинганди. Ҳозир кунига 120—130 минг ариза тушмоқда. Тўхталиш ва узилишларни ҳисобга олиб, ҳужжатларни рўйхатдан ўтказиш санасини бир-икки кунга чўзишнинг муаммоси йўқ. Лекин уни 10—20 кунлаб чўзиш имконияти йўқ, мантиққа ҳам тўғри келмайди. Муаммоларни бартараф этиш бўйча барча ректорлар билан алоҳида гаплашиб чиқдик», — дея қўшимча қилди у.
Маълумот учун, дастлабки режа бўйича абитуриентлардан аризалар қабули 15 июлга қадар давом этиши белгиланган. Барча ОТМ ва Давлат хизматлари марказларида 4,5 мингдан ортиқ оператор абитуриентларни рўйхатдан ўтказиш билан шуғулланмоқда. Олий ва ўрта махсус таълим вазирлиги маълумотларига кўра, 12 июль ҳолатига кўра 800 мингдан ортиқ абитуриент ўқишга кириш учун ариза топширган.
Изоҳ (0)