“Daryo”da Shahrisabz shahridagi 15-sonli maktabgacha ta’lim tashkilotida joriy yilning 1-iyun kuni 138 nafar bolaga 1 kilogramm go‘sht berilgani, qolaversa bolalar haqi — go‘shtdan urib qolish holatlari xususida so‘z yuritilgandi. Ushbu maqolaga Shahrisabz shahar maktabgacha ta’lim bo‘limi munosabat bildirdi.
Ma’lum bo‘lishicha, maqolada tilga olingan holatlar bo‘lim tomonidan o‘rganib chiqilgan. Unda shunday deyiladi: “Shahrisabz shahar maktabgacha ta’lim bo‘limi tasarrufidagi 15-maktabgacha ta’lim tashkiloti tomonidan 2019-yil iyun oyi uchun 140 nafar bola uchun oziq-ovqat mahsulotlariga rejali talabnoma shahar maktabgacha ta’lim bo‘limiga taqdim etilgan. Shunga ko‘ra, 2019-yilning iyun oyida oziq-ovqat mahsulotlari xarid qilish uchun 2019-yil 29-may kuni MTBda o‘tkazilgan 40-sonli tanloviga ko‘ra “Shahrisabz go‘sht mahsulotlari” xususiy korxonasi g‘olib deb topilib, shunga asosan 2019-yil 30-may kuni umumiy qiymati 107 532 000 (Bir yuz yetti million besh yuz o‘ttiz ikki ming) so‘mlik 10-sonli shartnoma tuzilgan. Ushbu shartnomaga asosan 2019-yil 1-iyundan boshlab bo‘lim tasarrufidagi 15-MTT ning xo‘jalik mudiri O.Sattarovga umumiy qiymati 5 million 472 ming so‘mlik 152 kg mol go‘shti uchun 01.06.2019 yilda №1251 sonli ishonchnomaga asosan 1-iyun kuni “Shahrisabz go‘sht mahsulotlari” xususiy korxonasi tomonidan 20 kg mol go‘shti mahsuloti yetkazib berilgan.
Maqolada bog‘cha mudirasi va hamshirasi bergan ma’lumotga ko‘ra, ushbu bog‘chani go‘sht mahsuloti bilan “Pahlavon germes” MChJ ta’minlashi haqida so‘z boradi. Aniqlanishicha, “Pahlavon germes” MChJ bog‘chani 2019-yilning 1-iyuniga qadar go‘sht bilan ta’minlagan. 1-iyun kunidan boshlab esa, bog‘chani go‘sht bilan “Shahrisabz go‘sht mahsulotlari” xususiy korxonasi ta’minlab kelgan.
Munosabat xatida shuningdek, “Shahrisabz shahar maktabgacha ta’lim bo‘limi tomonidan 15-MTT taomnomasi o‘rganilganda, 2019-yil 1-iyun kuni mudira tomonidan tasdiqlangan taomnomada 136 nafar bola kelganligi va 12,2 kg mol go‘shti berilganligi va bir bolaga 90 grammdan mol go‘shti to‘g‘ri kelganligi ko‘rsatilgan. 15-MTT mudirasi Hafiza Mahammadiyeva va hamshira Nargiza Bobomurodovaning e’tiborsizligi tufayli taomnomada ko‘rsatilgan jami go‘sht kilogrami 12,2 raqami o‘rniga 1 raqami qo‘yilgan va shu holatda qolib ketgan”, — deyiladi.
Shahrisabz shahar maktabgacha ta’lim bo‘limining tan olishicha, 15-MTT taomnomasi o‘rganilganda 2019-yil 3 va 4-iyun kunlarida bolalarga go‘sht mahsuloti SanPin me’yoriga nisbatan kam berilganligi aniqlangan.
Ma’lumot berishlaricha, Shahrisabz shahar maktabgacha ta’lim bo‘limi tomonidan o‘rganilgan natijalarga ko‘ra, o‘z vazifasiga e’tiborsiz qaragan 15-MTT hamshirasi Nargiza Bobomurodova hamda xo‘jalik mudiri O.Sattarovga “Hayfsan“ intizomiy jazosi berilgan. 15-MTT mudirasi Hafiza Mahammadiyevaga navbatdagi intizomiy chora ko‘rish uchun viloyat maktabgacha ta’lim boshqarma boshlig‘i nomiga bildirgi kiritilgan. Ushbu bildirgiga ko‘ra boshqarma boshlig‘ining 2019-yil 3-iyuldagi buyrug‘iga asosan bog‘cha mudirasiga ham “Hayfsan” intizomiy jazosi qo‘llangan.
Izoh (0)