O‘zbekistonda turizm sohasini jadal rivojlantirish, turizm infratuzilmasi, shu jumladan xorijiy sarmoyalarni jalb qilish, sayyohlar oqimini yanada oshirish maqsadida AQShda yashovchi o‘zbekistonlik – GMFR Global kompaniyasi prezidenti Dilovar G‘ulom va uning hamkorlari Jizzax viloyatiga tashrif buyurdi. Bu haqda Turizmni rivojlantirish qo‘mitasi matbuot xizmati xabar berdi.
Dilovar G‘ulom bilan olib borilgan ishlarning ilk natijasi sifatida joriy yilning 4-iyun kuni Jizzax viloyatida yangi turizm marshruti “Bibixonim qo‘rg‘onlari” tematik parkini barpo etish loyihasiga start berildi.
Mazkur loyihaning maqsadi – XIV asrga oid Bibixonim (Saroymulkxonim) qal’asini va Sarbozor karvonsaroyini turistik marshrutga aylantirish, tarixiy yodgorliklar topilgan ashyolar asosida “Yangi Xonimqo‘rg‘on muzeyi”ni tashkil qilish hamda qator turizm infratuzilmasi obyektlarini barpo qilishdan iborat.
Bundan tashqari, tashrif davomida Jizzax viloyati hokimligi, Turizmni rivojlantirish davlat qo‘mitasi va mahalliy davlat organlari vakillari ishtirokida uchrashuv tashkil etildi. Unda Jizzax viloyatida turizm sohasini rivojlantirish, turizm infratuzilmasini yanada yaxshilashga qaratilgan qator loyihalarni amalga oshirish, shuningdek boshqa sohalardagi istiqbolli loyihalar muhokama qilindi.
Xususan, Aydar-Arnasoy ko‘llar tizimi atrofida dam olish maskanlari hamda Sh.Rashidov tumanida mehmonxona va dam olish majmuasini barpo etish kabi loyihalar ko‘rib chiqilib, mazkur loyihalarga xorijiy investitsiya kiritish belgilab olindi.
Qayd etish joizki, davlat rahbari tomonidan xorijdagi vatandoshlarni O‘zbekistonda amalga oshirilayotgan islohotlarga yanada faol jalb etishga alohida e’tibor qaratilmoqda.
“O‘zbekiston - mening Vatanim, Ona yurtimga ilk marotaba tashrif buyurdim va o‘zgacha tuyg‘uni his etdim. Vatanim oldida ko‘plab ishlar qilishim kerakligini anglagan holda bir qator loyihalarga o‘z sarmoyalarimni kiritmoqdaman. O‘ylaymanki, bu kabi loyihalar yaqin kelajakda xalqimiz turmush darajasini oshirishga, turizm sohasini rivojlantirishga xizmat qiladi. Shuni alohida ta’kidlashim lozimki, biz xorijda yashayotgan men kabi vatandoshlar bilan birgalikda O‘zbekistonni yanada taraqqiy ettirishga bel bog‘laganmiz” – deydi AQShlik vatandoshimiz – GMFR Global kompaniyasi prezidenti Dilovar G‘ulom.
Izoh (0)