MIB matbuot xizmati Surxondaryoda byuro xodimlari do‘pposlangani holati yuzasidan “Daryo”ga izoh berdi.
Joriy yil 29-iyun kuni soat 11.00 larda MIB Sherobod tuman bo‘limi davlat inspektorlari A.Eshonqulov, S.Fozilov va P.Taylanov tumandagi “G‘o‘rin gilambob” mahallasi, “Do‘stlik” ko‘chasi, 112-uyda yashovchi Berdimurod Normurodovning yashash xonadonida foydalanilgan elektr energiyasi bo‘yicha qarzdorlikni aniqlash va undirish borasida ko‘rik o‘tkazgan vaqtida elektr energiyasidan 1 million 94 ming so‘m qarzdorlik mavjudligi aniqlangan.
Mazkur qarzdorlikni to‘lab berish to‘g‘risida xonadon egalariga tushuntirish berishayotganda B.Normurodovning 3 nafar o‘g‘li — 1978-yilda tug‘ilgan U.Normurodov, 1985-yilda tug‘ilgan L.Normurodov va 1990-yilda tug‘ilgan E.Berdimurodov xizmat vazifasini bajarayotgan inspektorlarga qarshilik ko‘rsatishib, ularni haqorat qilgan. Inspektor P.Taylanovni bosh qismiga qo‘llari bilan bir necha marotaba urib, A.Eshonqulovni yerga yiqitib, qo‘l va oyoqlari bilan uning duch kelgan joylariga bir necha marotaba urib, tepib, tan jarohati yetkazgan.
Mazkur holat yuzasidan tuman prokuraturasi tomonidan 3-iyul kuni E.Berdimurodov va L.Normurodovga nisbatan JKning 219-moddasi 2-qismi bilan jinoyat ishi qo‘zg‘atilib, JPKning 221-moddasi tartibida ushlanib, tergov harakatlari olib borilmoqda.
Izoh (0)