G‘ofur G‘ulom nomidagi istirohat bog‘i yaqinida turgan Spark avtomobilini minib qochgan uch nafar gumonlanuvchi Patrul-post xizmati xodimlari hamda Milliy gvardiya harbiy xizmatchilari tomonidan qo‘lga olindi. Bu haqda Toshkent shahar Ichki ishlar bosh boshqarmasi xabar berdi.
29-iyun kuni taxminan soat 22:00 da Ichki ishlar organiga Spark avtomobili minib qochilgani haqida xabar kelib tushgan. Voqea joyiga yetib kelgan tezkor-qidiruv guruhi videokameralar tomonidan qayd etilgan yozuvlarni ko‘rib chiqib, avtomobilga uch nafar noma’lum shaxs o‘tirib qochganini aniqlagan.
Minib qochilgan mashina va gumonlanuvchilarning belgilari Ichki ishlar organlari, Patrul-post va Yo‘l-patrul xizmatlariga yuborilgan.
30-iyun kuni soat 05:00 da Patrul-post xizmati xodimlari hamda Milliy gvardiya harbiy xizmatchilari Mirzo Ulug‘bek tumanida bir nafar qiz va ikki nafar bolaning tashqi ko‘rinishi avtomobil o‘g‘rilarinikiga mos kelgani sabab ularni qo‘lga olgan. Biroq ular minib qochilgan Spark’da bo‘lmagan.
Gumonlanuvchilardan birining ta’kidlashicha, ular bog‘ yonida turgan mashinani minib qochgan va Shayxontohur tumanida avariyaga uchragan. Mashinani YTH sodir bo‘lgan joyga qoldirib ketishgan.
Mazkur holat bo‘yicha Jinoyat kodeksining 267-modda 1-qismi bilan (“Transport vositasini olib qochish”) jinoyat ishi ochilgan.
Izoh (0)