Ғофур Ғулом номидаги истироҳат боғи яқинида турган Spark автомобилини миниб қочган уч нафар гумонланувчи Патруль-пост хизмати ходимлари ҳамда Миллий гвардия ҳарбий хизматчилари томонидан қўлга олинди. Бу ҳақда Тошкент шаҳар Ички ишлар бош бошқармаси хабар берди.
29 июнь куни тахминан соат 22:00 да Ички ишлар органига Spark автомобили миниб қочилгани ҳақида хабар келиб тушган. Воқеа жойига етиб келган тезкор-қидирув гуруҳи видеокамералар томонидан қайд этилган ёзувларни кўриб чиқиб, автомобилга уч нафар номаълум шахс ўтириб қочганини аниқлаган.
Миниб қочилган машина ва гумонланувчиларнинг белгилари Ички ишлар органлари, Патруль-пост ва Йўл-патруль хизматларига юборилган.
30 июнь куни соат 05:00 да Патруль-пост хизмати ходимлари ҳамда Миллий гвардия ҳарбий хизматчилари Мирзо Улуғбек туманида бир нафар қиз ва икки нафар боланинг ташқи кўриниши автомобиль ўғрилариникига мос келгани сабаб уларни қўлга олган. Бироқ улар миниб қочилган Spark’да бўлмаган.
Гумонланувчилардан бирининг таъкидлашича, улар боғ ёнида турган машинани миниб қочган ва Шайхонтоҳур туманида аварияга учраган. Машинани ЙТҲ содир бўлган жойга қолдириб кетишган.
Мазкур ҳолат бўйича Жиноят кодексининг 267-модда 1-қисми билан («Транспорт воситасини олиб қочиш») жиноят иши очилган.
Изоҳ (0)