Buxoroda 2-marotaba o‘tkazilgan Gullar bayrami uch kun davom etdi. Abu Ali ibn Sino nomli 8 gektarli Favvoralar maydoni 130 ta korxona va tashkilot tomonidan qariyb 1,5 millionga yaqin 50 turdan ziyod gullar bilan bezatildi. Bu haqda “Daryo” muxbiri xabar bermoqda.
120 turli element va dekoratsiyalardan tayyorlangan mashinalar, turli jonivor va qushlar timsoli karvoni ko‘hna shaharga sayohatga kelgan xorijlik mehmonlarning ham qiziqishiga sabab bo‘ldi.
O‘rta maxsus kasb-hunar ta’limi viloyat boshqarmasi boshlig‘i Hamid Qobilovning ma’lum qilishicha, 4x6 hajmli kitob ramzi — “Gullar bayrami”ning durdonasiga aylangan. Ushbu “Gulkitob” tayyorlanishida 20 ga yaqin mohir gulchilar va dizaynerlar jalb qilingan.
— Buxoroliklar azaldan ma’rifatparvar, kitobga, ilmu ziyoga oshno ekanligini Gullar bayramida ham namoyon eta olishgani tahsinga loyiq. Shunday go‘zallik, shunday joziba oldida men kitobga bo‘lgan mehru muhabbatimni izhor etmasligim mumkinmi, — dedi viloyat rahbari O‘ktam Barnoyev hamda kitobga bo‘lgan hurmatini “Gulkitob” oldida tiz cho‘kib ifodaladi.
Gullar bayramini yanada jozibador o‘tkazish uchun Samarqand, Toshkent hamda Namangan viloyatlaridan tajribali tadbirkor gulchilar taklif etilgan. Ular tomonidan buxorolik gulchilar o‘z peshona teri evaziga sho‘r tuproqqa, to‘g‘rirog‘i, tuz ustida ham bo‘ston yaratishga qodir, ular chinakam bobodehqonlardir, deya e’tirof etilgan.
Izoh (0)