Davlat test markazi Axborot texnologiyalari va kommunikatsiyalarini rivojlantirish vazirligi bilan hamkorlikda test sinovi o‘tkaziladigan binolar hududiga 120 dona mobil aloqani to‘suvchi qurilmani o‘rnatadi. Bu haqda milliy matbuot markazida o‘tkazilgan matbuot anjumanida Davlat test markazi Bosh boshqarma boshlig‘i Barno Rajabov ma’lum qildi, deb xabar berdi “Daryo” muxbiri Sevara Nishonova.
Shuningdek, binolarda 1155 tadan ortiq videokuzatuv kameralari, abituriyentlar sonidan kelib chiqqan holda metalloramalar, barmoq izi asosida tanish vositalari tayyorlanmoqda.
Qayd etilishicha, bugungi kunda respublika bo‘yicha jami 69 ta bino ajratib olingan. Ularning eng kattasi 1710, eng kichigi esa 240 o‘rinlidir. Ularda bir kunda 2 ta smenada 1277 ta guruhda jami 38 ming 310 nafar abituriyent test topshirishi mo‘ljallanmoqda.
Joriy yilning 16—23-aprel kunlari joylarda tanlab olingan binolarning test sinovlariga tayyorgarlik holati nizom talablari asosida o‘rganildi. O‘rganish davomida aniqlangan kamchiliklar bugungi kunda bartaraf etilmoqda. Bugungi kunda 289 ta katta hajmdagi binolarni sovutishga mo‘ljallangan konditsionerlar o‘rnatilgan, 198 ta konditsionerga ehtiyoj mavjud.
Ichimlik suvi va ruchkalar bilan ta’minlash, soyabonlar tashkil etish, bannerlarni tayyorlash, kutish joylarida maishiy sharoitlarni yaratish bo‘yicha ishlar olib borilmoqda.
Izoh (0)