Давлат тест маркази Ахборот технологиялари ва коммуникацияларини ривожлантириш вазирлиги билан ҳамкорликда тест синови ўтказиладиган бинолар ҳудудига 120 дона мобил алоқани тўсувчи қурилмани ўрнатади. Бу ҳақда миллий матбуот марказида ўтказилган матбуот анжуманида Давлат тест маркази Бош бошқарма бошлиғи Барно Ражабов маълум қилди, деб хабар берди «Дарё» мухбири Севара Нишонова.
Шунингдек, биноларда 1155 тадан ортиқ видеокузатув камералари, абитуриентлар сонидан келиб чиққан ҳолда металлорамалар, бармоқ изи асосида таниш воситалари тайёрланмоқда.
Қайд этилишича, бугунги кунда республика бўйича жами 69 та бино ажратиб олинган. Уларнинг энг каттаси 1710, энг кичиги эса 240 ўринлидир. Уларда бир кунда 2 та сменада 1277 та гуруҳда жами 38 минг 310 нафар абитуриент тест топшириши мўлжалланмоқда.
Жорий йилнинг 16—23 апрель кунлари жойларда танлаб олинган биноларнинг тест синовларига тайёргарлик ҳолати низом талаблари асосида ўрганилди. Ўрганиш давомида аниқланган камчиликлар бугунги кунда бартараф этилмоқда. Бугунги кунда 289 та катта ҳажмдаги биноларни совутишга мўлжалланган кондиционерлар ўрнатилган, 198 та кондиционерга эҳтиёж мавжуд.
Ичимлик суви ва ручкалар билан таъминлаш, соябонлар ташкил этиш, баннерларни тайёрлаш, кутиш жойларида маиший шароитларни яратиш бўйича ишлар олиб борилмоқда.
Изоҳ (0)