Samarqand dorixonalarida bojxona rasmiylashtiruvidan o‘tmagan va sifat sertifikati mavjud bo‘lmagan bir necha turdagi kontrabanda dori vositalari sotilayotgani aniqlandi. Bu haqda O‘zA xabar berdi.
Sog‘liqni saqlash vazirligi qoshidagi tibbiy mahsulotlarni sertifikatlashtirish bo‘yicha “Dori vositalari, tibbiy buyumlar va tibbiy texnika ekspertizasi va standartlashtirish Davlat markazi” DUKning bergan ma’lumotiga ko‘ra, Gruziyaning “Biopolus Ltd” korxonasi tomonidan “Unimed Group” korxonasi uchun ishlab chiqarilgan: 1. Batronat Seriya 010318; 2. Uniflex-Dual Seriya 020318; 3. Vitatsef Seriya 010318; 4. Batferon Seriya 010916 dori vositalari markaz laboratoriya tekshiruvidan o‘tmagan va ularga bojxona rasmiylashtiruvidan o‘tish va sotishga ruxsat beruvchi sifat sertifikatlari berilmagan.
Ushbu ma’lumotlar huquq-tartibot organlariga taqdim etildi va Bosh prokuratura huzuridagi Iqtisodiy jinoyatlarga qarshi kurashish Departamenti Samarqand shahar bo‘limi hamda Davlat xavfsizlik xizmati Samarqand viloyat boshqarmasining qo‘shma tadbiri doirasida 1 milliard so‘mga yaqin kotrabanda dori vositalari aniqlanib, musodara qilindi. Hozirgi kunda ushbu holat yuzasidan tekshiruv harakatlari davom etmoqda.
Davlat bojxona qo‘mitasi Axborot xizmati ma’lumotiga ko‘ra, 2019-yilning yanvar–aprel oylari davomida bojxona xizmati organlari tomonidan jami 210 ta huquqbuzarlik holatida 9,5 millard so‘mlik sifati kafolatlanmagan kontrabanda dori vositalari va tibbiyot buyumlari ashyoviy dalil sifatida olib qo‘yilgan.
Eslatib o‘tamiz, iste’molchilar sotib olayotgan dori vositalarining sifat sertifikati bor yoki yo‘qligi bo‘yicha ma’lumotni Sog‘liqni saqlash vazirligi qoshidagi sertifikatlashtirish organining rasmiy www.uzpharm-control.uz sayti orqali onlayn tarzda tekshirish imkoniga ega.
Izoh (0)