“Yoshlar press-klubi”da O‘zbekiston Yoshlar ittifoqi muassisligidagi Respublika yosh olimlar Kengashi faoliyatining yillik sarhisobi bo‘yicha “Yoshlarni ilm-fan sohasiga jalb etish va ilmiy- ijodiy faoliyatini qo‘llab-quvvatlash tizimini takomillashtirish” mavzusida matbuot anjumani bo‘lib o‘tdi. Bu haqda O‘zbekiston Yoshlar ittifoqi matbuot xizmati “Daryo”ga xabar berdi.
Tadbir avvalida Respublika yosh olimlar Kengashi tashabbusi bilan 2018-yil “Respublika yosh olimlarining innovatsion loyihalari” grant tanlovi g‘oliblarining yakuniy xisobot yarmarkasi tashkil qilindi. Xisobot yarmarkasida grant tanlovi g‘oliblari o‘zlarining innovatsion loyihalarining ekspozitsiyalarini taqdim etdi.
Anjumanda Respublika yosh olimlar Kengashining direktori Kamoliddin Mirzaahmedov bir yillik faoliyat mobaynida amalga oshirilgan ishlar hususida so‘z yuritdi.
O‘tgan davr mobaynida Kengash tomonidan ilmiy-amaliy anjumanlar, Orol dengizi geolokalizatsiyasini tadqiq etish bo‘yicha ilmiy ekspeditsiya, “INNODAYS-2017” ko‘rik-tanlovi, “Yoshlar kelajak bunyodkori” shiori ostida I Respublika ko‘rgazma savdosi, “Yosh vatandoshlar” festivali, “O‘rta Osiyo Robototexnika tanlovi”, “Best IP-2018” tanlovi hamda “INNOWEEK-2018” Respublika yosh ixtirochilarning innovatsion haftaligi tadbirlari o‘tkazildi.
“Respublika yosh olimlarining innovatsion loyihalari” grant tanlovi, Respublikaning tarixiy maskanlariga (Chiroqchi tumanidagi Munchoqtepa yodgorligi va Pastdarg‘om tumani tepaliklariga) yosh olimlarning ilmiy tadqiqot ekspeditsiyalari, “Yosh ixtirochilarning innovatsion yarmarkalari kabi jami 21 ta yirik loyihalar ham tashkil etilgan.Shuningdek, “Robototexnika laboratoriyasi”, Respublika yosh olimlarining “Innovatsiyalar texnoparki” va “Ilmiy-texnik laboratoriya”si, Yoshlar ittifoqining 14 ta hududiy Kengashlari qoshida “Yoshlar innovatsion g‘oyalar markazlari” faoliyati yo‘lga qo‘yildi.
Hozirda Respublika yosh olimlar Kengashining 351 nafar a’zosi bor. O‘zbekiston Respublikasi Intellektual mulk agentligining ixtirolar, foydali modellarga patent berish masalasida Respublika yosh olimlar Kengashi tomonidan jami 42 nafar yosh ixtirochilarga tavsiyanomalar taqdim etilgan.
Bundan tashqari, Respublika yosh olimlar Kengashi bilan 4 ta mahalliy oliy ta’lim muassasasi hamda 1 ta xalqaro oliy ta’lim muassasasi (Sibir boshqaruv instituti) bilan hamkorlik memorandumi imzolangan. Qolaversa, BMT Taraqqiyot dasturi (UNDP), BMT Ta’lim, fan va madaniyat masalalari bo‘yicha tashkiloti (UNESCO), BMT Bolalar jamg‘armasi (UNICEF)ning O‘zbekistondagi vakolatxonalari hamda boshqa tashkilotlar bilan yaqindan hamkorlik munosabatlari yo‘lga qo‘yilgan.
Anjuman doirasida Respublika yosh olimlar kengashining bir yillik faoliyatida amalga oshirilgan ishlar va amaliyotga joriy etilgan ilmiy loyihalar hamda istiqboldagi rejalar haqida yoshlar, tadqiqotchilar va yosh olimlar tomonidan berilgan savollarga spikerlar tomonidan javob berib o‘tildi.
Izoh (0)