UNESCO tadqiqotchisi O‘zbekistondagi ta’lim sohasi haqida fikr bildirdi

Qirg‘izistonda Germaniyaning DVV International tashkiloti tomonidan tashkil etilgan “Central Asian Adult education Forum 2019” xalqaro forumi bo‘lib o‘tmoqda. O‘zA muxbiri UNESCO ning Xalqaro anglashuv ta’limoti bo‘yicha Seuldagi Osiyo va Tinch okeani hududiy markazini olti yil davomida boshqargan, ayni paytda ta’lim bo‘yicha xalqaro mutaxassis-konsultanti janob Chong Utak bilan suhbatlashdi.

“O‘zbekistonda ta’lim sohasi bo‘yicha uch vazirlik faoliyat olib boradi. Maktabgacha ta’lim, Xalq ta’limi va Oliy va o‘rta maxsus ta’lim vazirliklari. Bu, albatta, O‘zbekistonning o‘ziga xos yo‘li. Men uni to‘g‘ri yoki noto‘g‘ri, deyish fikridan uzoqman, ammo men bir qancha davlatlar ta’lim sohasini o‘rgangan va tadqiqot olib borgan ta’lim sohasi bo‘yicha mutaxassis sifatida mazkur vazirliklar ko‘p mamlakatlarda yagona vazirlik sifatida birlashtirilganini ko‘rganman. Ularda maktabgacha, maktab, kasb-hunar va oliy ta’lim bo‘yicha departamentlar tashkil etilgan. Xususan, Janubiy Koreyada ham yagona Ta’lim vazirligi mavjud bo‘lib, uning viloyatlar bo‘yicha vazir o‘rinbosarlari ovoz berish yo‘li bilan saylanadi. UNESCO ma’lumotiga ko‘ra, O‘zbekistonda bog‘cha, maktab va oliy ta’limda tahsil oluvchi aholi 7 milliondan ziyod. Koreyada ta’lim oluvchi aholi soni bundan ko‘proq bo‘lishiga qaramasdan ularni yagona Ta’lim vazirligi boshqarib keladi. Yagona tizim orqali esa katta natijalarga erishish mumkin”, —  dedi janob Chong Utak.

Shuningdek, ayrim davlatlarda ta’lim sohasiga mas’ul vazir Bosh vazir o‘rinbosari mavqeiga tenglashtirilgan. Sababi ta’lim tizimida boshqa vazirliklarning ham ishtiroki va hissasi muhim. Masalan, sog‘liq bo‘yicha sog‘liqni saqlash, sport bo‘yicha sport vazirliklarining ham javobgarligi katta.

Ta’lim vazirining Bosh vazir o‘rinbosariga tenglashtirilishi ushbu vazirliklar o‘rtasida munosabat va nazoratning shakllanishida yordam beradi. Xususan, Koreyada ham ta’lim tizimi shu tarzda tashkillashtirilgan va uning amaliyotdagi samarasi ham qoniqarli. Ta’lim tizimi jahondagi yetakchilardan hisoblangan Janubiy Koreyaning ta’lim tizimi aynan shunday tashkil etilgan.