Фуқаролик ишлари бўйича Фарғона туманлараро судининг 2018 йилдаги ижро варақасига асосан Фарғона шаҳрида яшовчи А.Жўраевдан Қирғизистоннинг Ўш вилоятида яшовчи М.Абидова фойдасига 88,4 миллион сўм қарз ундириш белгиланган. Бу ҳақда ЎзА хабар берди.
Мазкур ҳолат юзасидан Мажбурий ижро бюроси Фарғона шаҳар бўлими томонидан ижро иши юритуви қўзғатилган ва суд қарори ижросини таъминлаш бўйича қарздорга 15 кунлик ихтиёрий муддат берилган.
Бироқ, А.Жўраев М.Абидовага 88,4 млн. сўм қарзини осонликча бериб қўймасдан давлат ижрочисининг чақирувларига жавоб бермаган ва доим чап беришга ҳаракат қилиб келган.
Мажбурий ижро ҳаракатлари давомида қарздорнинг яшаш манзилидан эҳтиёжидан ортиқча мулк аниқланмаган, номига расмийлаштирилган кўчмас мулк ва банкларда пул маблағлари мавжуд бўлмаса-да, унга тегишли Cobalt русумли автомашинаси борлиги аниқланган.
Автомобилга нисбатан тегишли идораларга тақиқлар қўйилди, лекин қарздор ҳа деганда машинани давлат ижрочисига бериб қўймади, анчагача яшириб юрди. МИБ шаҳар бўлими ва шаҳар ЙХҲБ ходимлари ўзаро ҳамкорликда ўтказилган рейд натижасида А.Жўраев ушбу машинани бошқариб юрган вақтда ушланган ва автомобиль белгиланган тартибда ҳужжатлар расмийлаштирган ҳолда хатланиб, жарима майдончасига киритилган.
Давлат ижрочиси томонидан автомобиль баҳоланиб, очиқ онлайн савдоларига киритилган. Шундагина қарздор машинадан айрилиб қолишдан чўчиб, М.Абидовани етаклаб МИБ шаҳар бўлимига кириб келди ва шу ернинг ўзида унга 87 миллион сўм қолган қарздорликни тўлиқ санаб топширди.
Изоҳ (0)