Joriy yil 13-iyun kuni taxminan soat 12.30 larda Samarqand tumani, Andijoniy mahallasida joylashgan 30-sonli maktabgacha ta’lim muassasasi oshxonasida maishiy gaz balloni portlagan va yong‘in vujudga kelgan. Yong‘inni bartaraf etish uchun kamida to‘rtta o‘t o‘chirish avtomobili jalb qilingan. Bu haqda O‘zA xabar berdi.
Oradan uch kun o‘tgan bo‘lsa-da, tuman hokimi Shuhrat Jamolov na voqea joyiga shaxsan borgan va na holat yuzasidan tuman ishchi guruhini tuzgan.
Gaz portlaganidan keyingi kundan boshlab bog‘cha shtat rejimda faoliyat ko‘rsata boshlagan. Oshxonasi kuyib kul bo‘lgan bog‘chadagi bolalarga qanday qilib ovqat tayyorlab berilayotgani noma’lum. Bog‘cha mudirasi yong‘in holatini yashirish maqsadida tezlik bilan o‘z hisobidan muassasa oshxonasini ta’mirlamoqda, hattoki akfa romlar o‘rnatilgan. Yong‘in bo‘yicha Maktabgacha ta’lim vazirligi ham xabardor etilmagan.
Bog‘cha yaqinidagi odamlar portlash ovozini eshitib, bu yuzasidan murojaat etganiga qaramay, o‘t o‘chiruvchilarning yong‘in dalolatnomasida portlash holati ro‘yxatga olinmagan.
Qo‘shni qishloqlardagi kattalarni cho‘chitgan bu portlash voqea yonida bo‘lgan 200 nafardan ortiq yosh bolaga qanday ta’sir etganligi noma’lum. Ularga tibbiy yoki psixologik yordam ko‘rsatilmagan. Voqea kunduz kuni jamoat joyida bo‘lganligi sababli jabrlanganlar ham bo‘lishi mumkin.
Xabarda Bosh prokuratura va Maktabgacha ta’lim vazirligidan ushbu holatga e’tibor qaratish, tuman hokimi Shuhrat Jamolov va Samarqand viloyat yong‘in xavfsizligi boshqarmasi rahbariyati harakatlariga qonuniy baho berish so‘ralgan.
Izoh (0)