Samarqandda bir oilaning besh vakili o‘ldirilishi bilan bog‘liq jinoyat sabablari Ichki ishlar vazirligi tomonidan o‘rganilib, kamchiliklarga yo‘l qo‘ygan xodimlarga intizomiy chora ko‘riladi. “Daryo” muxbiri Musulmonbek Ibrohimovning xabar berishicha, bu haqda IIV Huquqbuzarliklar profilaktikasi bosh boshqarmasining muhim topshiriqlar bo‘yicha inspektori Umid Mirzatillayev ma’lum qilgan.
Samarqandning Qo‘shrabot tumanida 15-may kuni bir oilaning besh a’zosi jasadlari topilgan edi. Oradan uch kun o‘tib, ushbu qotillik jinoyatini sodir etishda gumonlanib to‘rt kishi ushlandi. Inspektor Mirzatillayevning ta’kidlashicha, jinoyat sodir etilgan hudud uch kun davomida o‘rganilgan.
“Mudhish voqea sodir bo‘lgan joy, jabrlanuvchilar va gumonlanuvchilarning sharoiti sinchiklab o‘rganildi. Qo‘ni-qo‘shnilar, mahalla raislari va ularning yordamchilari bilan suhbatlar o‘tkazilib, ma’lumotlar olindi. Shuningdek, profilaktika inspektorlari, tumandagi huquqni muhofaza qiluvchi organ rahbarlari faoliyati bo‘yicha kerakli hujjatlar rasmiylashtirildi”, — dedi Umid Mirzatillayev.
Mavzuga doir: Samarqand viloyati hokimi o‘rinbosari: “Ishtixondagi kabi mudhish qotilliklar takrorlanmasligiga va’da beraman”
“Tekshiruv natijalariga ko‘ra kamchilikka yo‘l qo‘ygan xodimlarga intizomiy jazo choralari qo‘llaniladi. Hamkorlikda faoliyat olib borayotgan tashkilotlarga esa taqdimnomalar kiritish ko‘zda tutilgan. Shu orqali quyi tizimlarida xizmat qilayotgan ichki ishlar va boshqa mutasaddi tashkilotlar xodimlarining zimmasidagi mas’uliyatni oshirish ko‘zlangan”, — deya qo‘shimcha qildi IIV vakili.
Izoh (0)