Самарқандда бир оиланинг беш вакили ўлдирилиши билан боғлиқ жиноят сабаблари Ички ишлар вазирлиги томонидан ўрганилиб, камчиликларга йўл қўйган ходимларга интизомий чора кўрилади. «Дарё» мухбири Мусулмонбек Иброҳимовнинг хабар беришича, бу ҳақда ИИВ Ҳуқуқбузарликлар профилактикаси бош бошқармасининг муҳим топшириқлар бўйича инспектори Умид Мирзатиллаев маълум қилган.
Самарқанднинг Қўшработ туманида 15 май куни бир оиланинг беш аъзоси жасадлари топилган эди. Орадан уч кун ўтиб, ушбу қотиллик жиноятини содир этишда гумонланиб тўрт киши ушланди. Инспектор Мирзатиллаевнинг таъкидлашича, жиноят содир этилган ҳудуд уч кун давомида ўрганилган.
«Мудҳиш воқеа содир бўлган жой, жабрланувчилар ва гумонланувчиларнинг шароити синчиклаб ўрганилди. Қўни-қўшнилар, маҳалла раислари ва уларнинг ёрдамчилари билан суҳбатлар ўтказилиб, маълумотлар олинди. Шунингдек, профилактика инспекторлари, тумандаги ҳуқуқни муҳофаза қилувчи орган раҳбарлари фаолияти бўйича керакли ҳужжатлар расмийлаштирилди», — деди Умид Мирзатиллаев.
Мавзуга доир: Самарқанд вилояти ҳокими ўринбосари: «Иштихондаги каби мудҳиш қотилликлар такрорланмаслигига ваъда бераман»
«Текширув натижаларига кўра камчиликка йўл қўйган ходимларга интизомий жазо чоралари қўлланилади. Ҳамкорликда фаолият олиб бораётган ташкилотларга эса тақдимномалар киритиш кўзда тутилган. Шу орқали қуйи тизимларида хизмат қилаётган ички ишлар ва бошқа мутасадди ташкилотлар ходимларининг зиммасидаги масъулиятни ошириш кўзланган», — дея қўшимча қилди ИИВ вакили.
Изоҳ (0)