Joriy yil 10—15-sentabr kunlari Qo‘qon shahrida xalqaro hunarmandchilik festivali bo‘lib o‘tadi. Unda 50 dan ortiq xorijiy davlatdan mahoratli hunarmandlar, amaliy san’at ustalari, mutaxassislar, soha olimlari va faxriy mehmonlar ishtirok etishi kutilmoqda. Bu haqda O‘zA xabar berdi.
Ayni kunlarda mazkur nufuzli tadbirga qizg‘in tayyorgarlik ko‘rilmoqda. Ko‘cha va xiyobonlar obodonlashtirilib, mehmonxonalar, xizmat ko‘rsatish va servis majmualari, turli inshootlar qad rostlamoqda.
Xalqaro hay’at tomonidan ko‘rik-tanlov ishtirokchilarining mahsulotlari ko‘rgazmasi va mahorat darslari 5 ta nominatsiya bo‘yicha baholanib, mukofot jamg‘armasi 45 ming dollarni tashkil etishi rejalashtirilgan.
Respublika “Hunarmand” uyushmasi joriy yil mart oyida World Craft Council (Jahon hunarmandlar kengashi) a’zosi bo‘ldi. Kengashning Osiyo-Tinch okeani mintaqasi bo‘yicha prezidenti Gada Kaddumi Qo‘qon shahrida xalqaro festivalga tayyorgarlik jarayoni hamda hunarmandlar faoliyati bilan yaqindan tanishdi.
— Termizda xalqaro baxshichilik san’ati festivalida qatnashdim, — deydi Gada Kaddumi. — Qo‘qon shahrida birinchi marta o‘tkazilayotgan xalqaro hunarmandchilik festivaliga katta tayyorgarlik ishlari olib borilayotganligining guvohi bo‘ldim. Ayni paytda Qo‘qonga jahon hunarmandlar shahri maqomini berish bo‘yicha hamkorlikdagi ishlarimiz davom etmoqda.
Qo‘qon shahar hokimi Ma’rufjon Usmonov mehmonni xalqaro festivalga tayyorgarlik borasidagi ishlar bilan tanishtirdi. O‘rda xiyoboni, Qo‘qon madaniyati tarixi muzeyi, jome masjidi, Madrasai Mir kabi joylar Gada Kaddumi xonimda katta taassurot qoldirdi.
Izoh (0)