Жорий йил 10—15 сентябрь кунлари Қўқон шаҳрида халқаро ҳунармандчилик фестивали бўлиб ўтади. Унда 50 дан ортиқ хорижий давлатдан маҳоратли ҳунармандлар, амалий санъат усталари, мутахассислар, соҳа олимлари ва фахрий меҳмонлар иштирок этиши кутилмоқда. Бу ҳақда ЎзА хабар берди.
Айни кунларда мазкур нуфузли тадбирга қизғин тайёргарлик кўрилмоқда. Кўча ва хиёбонлар ободонлаштирилиб, меҳмонхоналар, хизмат кўрсатиш ва сервис мажмуалари, турли иншоотлар қад ростламоқда.
Халқаро ҳайъат томонидан кўрик-танлов иштирокчиларининг маҳсулотлари кўргазмаси ва маҳорат дарслари 5 та номинация бўйича баҳоланиб, мукофот жамғармаси 45 минг долларни ташкил этиши режалаштирилган.
Республика «Ҳунарманд» уюшмаси жорий йил март ойида World Craft Council (Жаҳон ҳунармандлар кенгаши) аъзоси бўлди. Кенгашнинг Осиё-Тинч океани минтақаси бўйича президенти Гада Каддуми Қўқон шаҳрида халқаро фестивалга тайёргарлик жараёни ҳамда ҳунармандлар фаолияти билан яқиндан танишди.
— Термизда халқаро бахшичилик санъати фестивалида қатнашдим, — дейди Гада Каддуми. — Қўқон шаҳрида биринчи марта ўтказилаётган халқаро ҳунармандчилик фестивалига катта тайёргарлик ишлари олиб борилаётганлигининг гувоҳи бўлдим. Айни пайтда Қўқонга жаҳон ҳунармандлар шаҳри мақомини бериш бўйича ҳамкорликдаги ишларимиз давом этмоқда.
Қўқон шаҳар ҳокими Маъруфжон Усмонов меҳмонни халқаро фестивалга тайёргарлик борасидаги ишлар билан таништирди. Ўрда хиёбони, Қўқон маданияти тарихи музейи, жоме масжиди, Мадрасаи Мир каби жойлар Гада Каддуми хонимда катта таассурот қолдирди.
Изоҳ (0)