Toshkent xalqaro aeroporti chegara bojxona posti xodimlari Aviatsiya xavfsizligi xizmati vakillari bilan hamkorlikda “Tilla kamar” operatsiyasini fosh etdi. Bu haqda “Daryo”ga Bojxona qo‘mitasi matbuot xizmati ma’lum qildi.
“Yashil yo‘lak”dan o‘tib, Toshkent—Dehli yo‘nalishi bo‘yicha uchib ketishga shaylanayotgan A.A.ning hatti-harakatlari bojxonachilar e’tiborini tortdi. Xolislar ishtirokida tekshiruvdan o‘tkazilganda ushbu fuqaro kamarining o‘tkazgichi tilladan yasalib, bojxonachilar payqamasligi uchun qora rangga bo‘yalgani ma’lum bo‘ldi. Uddaburon fuqaro bu bilan kifoyalanmay, oyoq kiyimlari ichiga ham tilla yashirgani aniqlandi.
A.A.dan olingan ashyoviy dalillarning vazni 200 grammni tashkil etib, umumiy qiymati 59 million so‘mga tengligi bildirilmoqda.
Ayni paytda ushbu holat yuzasidan bojxona tekshiruvlari davom ettirilmoqda.
Izoh (0)