Ehtiyojmand oilalarning iqtidorli farzandlari davlat tomonidan qo‘llab-quvvatlanadi

Ijtimoiy ehtiyojmand oilalarning iqtidorli farzandlari uzluksiz ta’lim olishini moddiy va ma’naviy jihatdan qo‘llab-quvvatlash tartibi to‘g‘risida nizom tasdiqlandi, deb xabar berdi Norma.

Qanday qo‘llab-quvvatlash turlari nazarda tutilgan?

Hujjatda iqtidorli bolalarga ko‘mak berish uchun kompleks chora-tadbirlar nazarda tutilgan. Masalan, hududlar kesimida maxsus idoralararo kengashlar har o‘quv yili boshidan boshlab ular uchun quyidagi xarajatlarni qoplaydi:

• zamonaviy yagona maktab formasi (issiq kiyim-bosh) bilan ta’minlash;
• asosiy turdagi o‘quv qurollari bilan ta’minlash;
• badiiy kitoblar bilan ta’minlash;
• bolalar gazeta va jurnallariga obuna qilish;
• respublika oromgohlarida dam olishini tashkil etish;
• respublika bo‘ylab sayohatga borish va kelish.

Bundan tashqari, ijtimoiy ehtiyojmand oilalarning iqtidorli farzandlari to‘garaklar, tanlovlar, musobaqalar va boshqa tadbirlarda ishtirok etishga, uzaytirilgan kun guruhlariga, shuningdek Yoshlar ittifoqining boshlang‘ich tashkilotlaridagi jamoatchilik faoliyatiga faol jalb etiladi.

Kimlar qo‘llab-quvvatlanadi?

Qo‘llab-quvvatlanadigan bolalarni aniqlashda quyidagi ijtimoiy mezonlarga e’tibor qaratiladi:

• o‘quvchining ko‘p bolali oiladan ekanligi (oilada uch va undan ortiq bola mavjudligi);
• o‘quvchining oilasida I va/yoki II guruh nogironligi bo‘lgan shaxslarning mavjudligi;
• o‘quvchining yolg‘iz ona (ota) tomonidan ikki yoki undan ortiq voyaga yetmagan farzandlar tarbiyalayotgan oiladan ekanligi;
• o‘quvchining fan, san’at, ta’lim va boshqa yo‘nalishlarda yutuqlari, turli olimpiadalar, ko‘rik-tanlovlar hamda sport musobaqalarida g‘olib va sovrindorligi, a’lo baholarga o‘qishi.

Yoshlar ittifoqining bola o‘qiydigan ta’lim muassasasidagi boshlang‘ich tashkiloti va fuqarolarning o‘zini o‘zi boshqarish organi har yili 1-iyunga qadar idoralararo kengashga ko‘mak olish uchun yozma tavsiya bilan birga quyidagi hujjatlarni taqdim etishlari shart:

• ijtimoiy ehtiyojmand oilalarning iqtidorli farzandlari tomonidan qo‘lga kiritilgan yutuqlarini tasdiqlovchi hujjatlar (olimpiadalar, ko‘rik-tanlovlar hamda sport musobaqalarida g‘olib va sovrindorligini tasdiqlovchi diplomlar va boshqa shu kabi hujjatlar nusxasi) – mavjud bo‘lganda;
• o‘quvchi va uning oila a’zolarining pasporti va/yoki tug‘ilganlik to‘g‘risidagi guvohnomasi nusxalari;
• o‘quvchining oila a’zlari I va/yoki II guruh nogironligini tasdiqlovchi hujjatlar nusxasi – mavjud bo‘lganda;
• o‘quvchining oilasi boquvchisini yo‘qotganligi to‘g‘risida hujjat nusxasi – mavjud bo‘lganda.

Idoralararo kengash har yili 30-iyunga qadar qo‘llab-quvvatlash bo‘yicha tegishli qarorni qabul qilishi shart.

Hujjat Qonun hujjatlari ma’lumotlari milliy bazasida e’lon qilingan va 2019-yil 28-martdan kuchga kirdi.