Shavkat Mirziyoyev 29-mart kuni Buxoro viloyatining G‘ijduvon tumaniga tashrif buyurdi. Bu haqda Prezident matbuot xizmati ma’lum qildi.
Abduxoliq G‘ijduvoniy maqbarasi ziyorat etilib, Qur’on tilovat qilindi.
Davlat rahbari maqbarada amalga oshirilgan qurilish-ta’mirlash ishlarini ko‘zdan kechirdi. Bu yerga imom-xatiblarni jalb etib, ularga allomalarimiz ma’naviy merosini to‘g‘ri va chuqur o‘rgatish, xalq qa yetkazish bo‘yicha topshiriqlar berdi.
— Kitobda o‘qish boshqa, ziyorat qilib, yurakdan o‘tkazib o‘rganish boshqa. Bu joy ma’rifat markazi bo‘lishi, odamlar o‘ziga ilm olib ketishi kerak, — dedi Shavkat Mirziyoyev.
O‘tgan yil 16-fevral kuni viloyatga tashrif chog‘ida Prezident “Yetti pir” maqbaralarini obod qilish, ularni bog‘lovchi turizm yo‘nalishi tashkil etish bo‘yicha ko‘rsatmalar bergan edi. Abduxoliq G‘ijduvoniy mazkur yetti pirning birinchisi sanalib, Xojagon tariqati asoschisidir. Keyinchalik Orif Revgariy, Mahmud Fag‘naviy, Ali Romitaniy, Muhammad Boboi Samosiy, Sayyid Amir Kulol bu ma’naviy yo‘nalishni davom ettirib, Bahouddin Naqshband uni yuksak bosqichga olib chiqqan.
Shu yerda mazkur ziyoratgohlarda amalga oshirilgan va davom etayotgan ta’mirlash, obodonlashtirish ishlari haqida ma’lumot berildi. Davlat rahbari bu maskanlarni obod qilish bilan birga “Yetti pir” haqida kitob yaratish, ularning ilmiy merosini targ‘ib etish zarurligini ta’kidladi.
Islom hamkorlik tashkilotining Ta’lim, fan va madaniyat masalalari bo‘yicha tashkiloti — ISESCO tomonidan Buxoro shahri 2020- yilda Islom madaniyati poytaxti deb e’lon qilindi.
Prezident bu sanaga yuqori darajada tayyorgarlik ko‘rish, uning doirasidagi tadbirlarni Abduxoliq G‘ijduvoniy tavalludining 915 yilligi va Bahouddin Naqshband tavalludining 700 yilligi bilan hamohang nishonlash, xalqaro ilmiy konferensiya o‘tkazish bo‘yicha ko‘rsatmalar berdi.
Izoh (0)