2019 йил 29 март куни соат 14.30 да Наманганда кучли гумбурлаш содир бўлди. Бу ҳақда «Дарё» мухбири хабар бермоқда.
Аввалгилардан фарқли равишда, бу гал гумбурлаш фақат Наманган шаҳри ва унга туташ ҳудудларда эшитилди. Гувоҳлар кучли овоз осмондан келгани, унинг таъсирида дераза ойналари зириллаб кетганини айтмоқда.
Вилоят Фавқулодда вазиятлар бошқармаси бошлиғи полковник Ботиржон Ашуровга кўра, навбатчилик қисмларига портлаш, ёнғин, табиат ҳодисаси ёки шунга ўхшаш фавқулодда ҳолатлар юз бергани тўғрисида мурожаатлар келиб тушмаган.
«Ўзгидромет» вилоят бўлими ва сейсмология хизматларида ҳам бу ҳолат юзасидан аниқ изоҳ йўқ.
Маълумот учун, 2018 йил 6 декабрь куни Наманганда илк бор қаттиқ гумбурлаш овози эшитилганди. Ўшанда аввалига Мингбулоқ нефть конида портлаш юз бергани маълум қилинди, кейинчалик бу хабар рад этилди. 14 декабрда эса бу ҳолат яна такрорланганди.
Изоҳ (0)