Shimoliy Koreya rahbari Kim Chen Inga qarshi bo‘lgan “Erkin Choson” muholifat guruhi 22-fevral kuni Madridda joylashgan KXDR elchixonasiga qilingan hujum uchun javobgarlikni o‘z zimmasiga oldi, deya xabar beradi “Interfaks”.
“Bu hujum emas edi. Biz Madriddagi elchixonada yuz bergan favqulodda vaziyat uchun javobgarmiz. Biz elchixonaga taklif etildik, biroq xabarlarda aytilganidek hech kimga zo‘ravonlik o‘tkazmadik”, — deyiladi guruh bayonotida.
“Biz elchixona xodimlari bilan ehtiyotkor munosabatda bo‘ldik”, — deyiladi xabarda.
Guruhga ko‘ra, hech bir hukumat rejalardan xabardor yoki ushbu hodisaga aloqador emas edi.
Xabarda aytilishicha, “ushbu ma’lumotlar ixtiyoriy ravishda, bizning emas ularning iltimosiga binoan berilgan”. Guruh o‘z bayonotida axborot chiqib ketishida Federal qidiruv byurosini ayblagan.
“Bizni aniqlashga yordam beradigan ma’lumotlar bilan bo‘lishish, Pxenyan rejimiga yordam berish bilan barobardir” — deyiladi guruh bayonotida.
“Erkin Choson” sirli guruhi o‘zini Shimoliy Koreya xalqini vakolatlovchi vaqtinchalik hukumat deb ataydi hamda Shimoliy Koreya rahbarining o‘gay ukasi Kim Chen Namning o‘g‘li Kim Xan Solni himoya qiladi.
22-fevral kuni Madriddagi KXDR elchixonasiga noma’lum shaxslar guruhi kirib, xodimlarni bog‘lab, kompyuterlar va hujjatlarni olib qochib ketgan edi.
O‘z navbatida, Amerika Qo‘shma Shtatlari ushbu hodisaga aloqadorligini inkor etadi.
Izoh (0)