Gavayida avtomobil olib qochgan shaxsga 4 yil davomida pepsi-kola ichish taqiqlandi

Gavayi shtatida sudya Ronda Lou avtomobil o‘g‘irlagan 21 yoshli Kristofer Montilyanoga to‘rt yil davomida pepsi-kola ichishni taqiqladi, deb xabar berdi “TASS”.

2018-yilning iyunida Montilyano o‘zi o‘g‘irlagan avtomobilni boshqarib ketayotganida qo‘lga olingan.

Yigit politsiyaga avtomobil amakivachchasiniki ekanini va u o‘zining sevimli ichimligi bo‘lgan pepsi-kolani xarid qilish uchun chiqqanini aytib, o‘zini oqlamoqchi bo‘lgan.

Sudda esa yigit haydovchilik guvohnomasiga ega emasligi va mashinani egasining roziligisiz olganini ma’lum qilgan.

Yigit qo‘lga olinganidan so‘ng yetti sutka qamoqda o‘tirgan.

“Boshqa mashina olib qochmayman. Boshqa qamoqqa tushishni istamayman”, — deydi yigit sudyaga.

Natijada sudya uni 100 soat jamoatchilik ishlari bilan shug‘ullanishga, 100 dollar jarima to‘lashga va to‘rt yil davomida pepsi-kola ichmaslikka hukm qildi.

“Men insonlarning narkotik va alkogolga ruju qo‘ygani haqida ko‘p eshitganman. Lekin birinchi marta gazlangan ichimliklarga ruju qo‘ygan insonni uchratishim. Sudlanuvchi pepsi-koladan voz kechish sindromini to‘laqonli ravishda his etsin”, — deydi sudya.