Ўзбекистон давлат санъат ва маданият институти ташаббуси билан бундан бир йил аввал Мўйноқ тумани Шағирли овулида бунёд этилган «Қўқон боғи»га экилган дарахтлар куртак ёза бошлади. Бу ҳақда ЎзА хабар берди.
Ҳозирги кунда ушбу жойда экилган мевали ва манзарали дарахтларнинг асосий қисми, ерга мослашиб тутиб кетди.
Мўйноқ туманидаги экологик муаммони бартараф этишда ўз улушини қўшиш мақсадида Ўзбекистон давлат санъат ва маданият институти раҳбарияти ташаббуси билан ўтган йили «Қўқон боғи» ташкил этилган эди. Муассасанинг Фарғона ва Нукус филиаллари иштирокида боғни барпо этишда мевали дарахтлар ва Калифорния дарахти қаламчалари олиб келиниб экилган.
Ушбу хайрли ишнинг мантиқий давоми сифатида ўрмон хўжалиги тасарруфидаги 2 гектар майдонда Ўзбекистон Миллий университетининг ўқув-илмий майдончаси ташкил этилиб, ушбу университетнинг талаба-ёшлари боғ барпо қилмоқда. Мазкур ишда Нукус давлат педагогика институти ҳамда Қорақалпоқ давлат университети талабалари ҳам ҳамкорлик қилмоқда.
«Орол ва ёшлар» шиори остида ташаббускор талаба-ёшлар ўқув-илмий экспедицияси аъзолари томонидан ташкил қилинган ушбу тадбирнинг дастлабки кунида ҳудуд тўлиқ кўчатлар экиш учун тайёрланди.
Экспедиция ахборот хизмати маълумотига кўра, ҳозирда боғ яратиш ишлари бошланиб, ҳудудни симметрик ўлчаш, жўяк олиш, чуқурчалар қазиш, тупроқ геоморфологиясини тадқиқ қилиш каби ишлар бажарилди. Арча ва ток кўчатлари экилди. Умуман, янги боғга 12 турдаги мевали, манзарали ўсимликлар экилиши режа қилинган.
Талабаларнинг илмий-тадқиқот ишлари предмети айнан Орол муаммоси, Оролбўйи тупроғи, ўсимликлари, сувлари, уларнинг таркиби ҳамда хусусиятларини тадқиқ этишдир.
Экспедиция аъзолари ҳудудда илмий-тадқиқот ишларини олиб бориб, Оролбўйи тупроқлари, ўсимликлари, сувлари ва уларнинг таркиби ҳамда хусусиятларини ўрганади.
Изоҳ (0)