Keyingi 30 yil davomida AQShda qirg‘oq bo‘yi hududlarida joylashgan 400 mingga yaqin uylar iqlim o‘zgarishi tufayli suv ostida qolishi mumkin, deb yozadi Forum Daily.
Zillow ko‘chmas mulk saytida o‘tkazilgan tadqiqotga ko‘ra, AQSh aholisining taxminan 40 foizi ushbu iqlim o‘zgarishlarini ma’lum darajada sezishi mumkin. Saytda e’lon qilingan ma’lumotlarga ko‘ra, 2018-yilda bu uylarning umumiy qiymati 210 milliard dollarni tashkil etgan.
Suv toshqini xavfi yuqori bo‘lgan 10 ta eng asosiy shaharlarda yo‘qotish miqdori 34 milliard dollardan ortiq bo‘lishi mumkin. Vaqt o‘tishi bilan vaziyat yana-da yomonlashadi.
Ilmiy ma’lumotlar va kompyuter modellari to‘g‘ri chiqsa, 2100-yilga kelib mamlakat bo‘ylab umumiy qiymati 1,3 trillionga yaqin bo‘lgan taxminan 2,5 million uylar xavf ostida qolishi mumkin.
Quyida prognozlarga ko‘ra 2050-yilga kelib eng ko‘p zarar ko‘rishi mumkin bo‘lgan 10 ta shaharlar ro‘yxati keltirildi.
- San-Mateo, Kaliforniya
- Nyuport-Bich, Kaliforniya
- Nyu-York
- Mayami-Bich, Florida
- Charlston, Janubiy Karolina
- Long-Bich, Kaliforniya
- Sietl
- Stokton, Kaliforniya
- Boston
- Virjiniya-Bich, Virjiniya
Izoh (0)