Buyuk britaniyalik 4 yoshli qiz IQ ko‘rsatkichi 140 ballni tashkil etgani uchun dunyoning eng yosh daholaridan biri deb tan olindi. Bu haqda Daily Mail xabar berdi.
Angliyaning Ayver shahrida yashovchi Alana Jorj yuqori IQ egalarining xalqaro “Mensa” tashkilotining eng yosh a’zosiga aylangan. Uning ota-onasi Nadin va Edmundning aytishicha, qizcha kichikligidayoq harflar va raqamlarga qiziqqan hamda hech kimning yordamisiz o‘qishni o‘rgangan.
Ayol qizining vunderkind ekanini Alana yetti oyligidayoq ilk so‘zlarni talaffuz qila boshlaganida bilgan. Bir yil o‘tmasidan to‘liq gaplar bilan gaplasha olgan. Uch yoshida mustaqil ravishda sevimli ertaklaridan parchalarni o‘qishni o‘rgangan. Nadin qizining aqliy rivojlanishini tekshirtirish uchun mutaxassislarga murojaat qilgan. Testlar natijasi shuni ko‘rsatganki, qizcha 7 yoshli bola darajasida o‘qimoqda va 6,5 yosh darajasida o‘ylab, gaplashmoqda.
Ayni paytda Alana Buyuk Britaniya qirollik oilasining a’zolari o‘qigan maktabga boradi. Onasi qizining maktabda zerikmasligi va tengdoshlari bilan teng ravishda “baxtli bolalik”ni his qilishini ehtiyotkorlik bilan kuzatib boradi.
“Mensa” xuddi shu yoshdagi aqlli odamlarning ikki foizini o‘z ichiga oladi. Nashr ma’lumotlariga ko‘ra, kattalar o‘rtacha 100 ballik IQga ega. Nazariyachi fiziklardan Stiven Xoking va Albert Eynshteynning ko‘rsatkichlari taxminan 160 ball deb baholanadi, ammo ular test topshirmagan.
Izoh (0)