“Tolibon” terroristik harakati asoschisi mulla Umar AQSh hukumati o‘ylagandek Pokistonga qochib yoki tog‘larda yashirinib yurmagan, balki AQSh harbiy bazalari yaqinida yashagan, deb yozadi “Liga Novosti”.
Bu haqda sharqiy mamlakatlar bo‘yicha daniyalik jurnalist-tadqiqotchi Bett Dam o‘zining “Mulla Umarning sirli hayoti” kitobida yozgan.
U kitob ustida ish olib borishda besh yil davomida G‘arbning harbiy va razvedkasidan ham, tolibonlar, xususan, mullaning qo‘riqchisi Jabbor Umariy bilan suhbatlashish orqali ham ma’lumotlar to‘plagan.
Uning so‘zlariga ko‘ra, 2001-yilda “Tolibon” rejimi qulagach, tashkilotning sobiq rahbari hukumatdan yashirinib, AQSh harbiy bazasidan besh kilometr uzoqlikda joylashgan uyning maxfiy xonalarida yashagan. Jurnalistning ta’kidlashicha, bir marta NATO kuchlari bo‘linmalari uyni tintuv qilgan, ammo hech narsa topmagan.
Qo‘lga tushishning oldini olish maqsadida u vaqti-vaqti bilan dalalardagi sug‘orish tizimi trubalarida yashirinishiga to‘g‘ri kelgan.
Keyinchalik Umarni boshqa uyga yashirishgan. U ham AQShning boshqa harbiy bazasidan besh kilometr uzoqlikda joylashgan.
Jangarilarning bayonotiga qaramay, mulla huquq-tartibot organlaridan yashiringan holda tashkilotni boshqara olmagan. U 2001-yilning dekabr oyida tashkilotni boshqaruvini Tolibon “mudofaa vaziri” mulla Ubaydullaga topshirgan.
Usama bin Laden yo‘q qilinganidan so‘ng AQSh maxsus xizmati e’tiborni mulla Umarga qaratgan. Biroq u dushmanlar harakatidan emas, balki jangarilar ma’lum qilganidek, sil kasalligidan vafot etgan.
Izoh (0)