Shu kunlarda “Guanmin Yunnan” gospitalining beshta yetakchi vrach-oftalmologi va to‘qqizta volontyordan iborat Xitoy delegatsiyasining O‘zbekistonga tashrifi nihoyasiga yetmoqda. Ular o‘zlari bilan medikamentlar va tibbiy ashyolar ko‘rinishidagi gumanitar yukni olib kelgan.
Uch kun davomida xitoylik jarrohlar Toshkentdagi Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazida “Muruvvatda yorishgan olam” xitoy-o‘zbek xayriya aksiyasini o‘tkazdi.
Tibbiyot fanlari doktori, Toshkent viloyat ko‘z kasalliklari shifoxonasi bosh shifokori va Toshkent viloyatining bosh oftalmologi Abduvali Nabiyev bu haqda shunday dedi:
“Xitoylik hamkasblarimiz Toshkent viloyatidagi 106 ta bemorni ko‘rikdan o‘tkazib, kam ta’minlangan oilalardan “katarakta” diagnozi qo‘yilgan 87 ayolni tanlab olishdi. Birinchi kuni 26 ta bemor operatsiya qilindi. Xitoylik oftalmologlarning malakasi yuqori. Mikroxirurgik texnika ham juda yuqori darajada. Aniq va tez ishlashadi. Operatsiyaning ertasi kuni ertalab bog‘ichlarni yechishdi. Bemorlarning hammasi qoniqarli ahvolda. Hammasi ko‘ryapti. Ularning har biriga dorivor tomchilar va malham dorilardan iborat to‘plam berildi”.
Tibbiy brigadaning o‘ninchi volontyori, ushbu aksiyaning tashkilotchisi, “Xinjiang Asia-Europe International Material Trade Center Co., Ltd” kompaniyasining boshlig‘i Chjan Xunpin bo‘ldi. Xayriya aksiyasini o‘tkazish uchun Chjan Xunpin xonim o‘z shaxsiy mablag‘i hisobidan 1 412 530 yuan (210 592,77 dollar) sarfladi. Bu delegatsiyaning kelishi va transport, dori vositalari va tibbiy jihozlar, professor-oftalmologlar Lyuy Yuyszyan, Li Chuanpu, Duan Yuyven, Lyuy Chanxen va Chjan Yunpin (Lyu Yujian, Li Chuanpu, Duan Yuwen, Lyu Changhen va Zhang Yongping) ish haqlari bilan bog‘liq barcha xarajatlardir. O‘rni kelganda shuni aytib o‘tish joizki, bitta operatsiyaning narxi taxminan 1192 dollarni tashkil qiladi. 87 bemorning har biri uchun bunday operatsiya mutlaqo bepul o‘tkazildi.
“Mendan hattoki Xitoyning o‘zida ham ‘Nahotki Xitoyda katarakta bilan og‘riganlar yo‘q, nima uchun O‘zbekistonga boryapsiz’ deb so‘rashadi.Men ularga, nima xayr-ehsonning millati bormi yoki fuqaroligi, – deb javob beraman. Meni O‘zbekiston bilan ko‘p yillik munosabatlar bog‘lab turadi, bu yerda juda yaxshi do‘stlarim ko‘p. Shu sababli, tan olishim kerak, juda murakkab loyihani tashkillashtirishni o‘z zimmamga oldim, bu loyiha Xitoy Xalq Respublikasi Raisi Si Szinpinning ‘Bitta kamar – bitta yo‘l’ tashabbusi konsepsiyasiga ham to‘liq mos keladi. Konsepsiyaning asosiy maqsadi – global loyiha bilan qamrab olingan barcha 60 ta mamlakat aholisining turmush darajasini yaxshilash va farovonligini oshirishdan iborat”- deydi Chjan Xunpin.
Sanobar Saidova, Kattaqo‘rg‘on, 75 yoshda:
“Operatsiyadan ham, xitoylik vrachlarning munosabatlaridan ham ko‘nglim to‘ldi. Ko‘rish qobiliyatim asta-sekinlik bilan tiklanishiga ishonaman va umid qilaman, vrachlar bu jarayon birmuncha muddat davom etadi, deb aytishdi”.
Kimyoxon Rasulova, Yuqori Chirchiq tumani, 55 yoshda:
“Men yigirma kun avval bitta ko‘zimni operatsiya qildirgandim. Kecha ikkinchisini qilishdi. Hozirgina ko‘zimdan bog‘ichni yechishdi. Ko‘zim ko‘ryapti. Bu 8-martga juda ajoyib sovg‘a bo‘ldi”.
“Muruvvatda yorishgan olam” xitoy-o‘zbek xayriya aksiyasi Shanxay hamkorlik tashkiloti rahbarligida, O‘zbekiston sog‘liqni saqlash vazirligi, “Sog‘lom avlod uchun” xalqaro xayriya jamg‘armasi tashabbusi bilan, “Xinjiang Asia-Europe International Material Trade Center Co., Ltd” kompaniyasining tashkiliy va moliyaviy ko‘magi ostida o‘tkazildi.
Baxtiyor Nasimov,
“Daryo” sharhlovchisi
Izoh (0)