Шу кунларда «Гуанмин Юннан» госпиталининг бешта етакчи врач-офтальмологи ва тўққизта волонтёрдан иборат Хитой делегациясининг Ўзбекистонга ташрифи ниҳоясига етмоқда. Улар ўзлари билан медикаментлар ва тиббий ашёлар кўринишидаги гуманитар юкни олиб келган.
Уч кун давомида хитойлик жарроҳлар Тошкентдаги Республика ихтисослаштирилган кўз микрохирургияси илмий-амалий тиббиёт марказида «Мурувватда ёришган олам» хитой-ўзбек хайрия акциясини ўтказди.
Тиббиёт фанлари доктори, Тошкент вилоят кўз касалликлари шифохонаси бош шифокори ва Тошкент вилоятининг бош офтальмологи Абдували Набиев бу ҳақда шундай деди:
«Хитойлик ҳамкасбларимиз Тошкент вилоятидаги 106 та беморни кўрикдан ўтказиб, кам таъминланган оилалардан «катаракта» диагнози қўйилган 87 аёлни танлаб олишди. Биринчи куни 26 та бемор операция қилинди. Хитойлик офтальмологларнинг малакаси юқори. Микрохирургик техника ҳам жуда юқори даражада. Аниқ ва тез ишлашади. Операциянинг эртаси куни эрталаб боғичларни ечишди. Беморларнинг ҳаммаси қониқарли аҳволда. Ҳаммаси кўряпти. Уларнинг ҳар бирига доривор томчилар ва малҳам дорилардан иборат тўплам берилди».
Тиббий бригаданинг ўнинчи волонтёри, ушбу акциянинг ташкилотчиси, «Xinjiang Asia-Europe International Material Trade Center Co., Ltd» компаниясининг бошлиғи Чжан Хунпин бўлди. Хайрия акциясини ўтказиш учун Чжан Хунпин хоним ўз шахсий маблағи ҳисобидан 1 412 530 юан (210 592,77 доллар) сарфлади. Бу делегациянинг келиши ва транспорт, дори воситалари ва тиббий жиҳозлар, профессор-офталмологлар Люй Юйсзян, Ли Чуанпу, Дуан Юйвен, Люй Чанхен ва Чжан Юнпин иш ҳақлари билан боғлиқ барча харажатлардир. Ўрни келганда шуни айтиб ўтиш жоизки, битта операциянинг нархи тахминан 1192 долларни ташкил қилади. 87 беморнинг ҳар бири учун бундай операция мутлақо бепул ўтказилди.
«Мендан ҳаттоки Хитойнинг ўзида ҳам ‘Наҳотки Хитойда катаракта билан оғриганлар йўқ, нима учун Ўзбекистонга боряпсиз’ деб сўрашади.Мен уларга, нима хайр-эҳсоннинг миллати борми ёки фуқаролиги, – деб жавоб бераман. Мени Ўзбекистон билан кўп йиллик муносабатлар боғлаб туради, бу ерда жуда яхши дўстларим кўп. Шу сабабли, тан олишим керак, жуда мураккаб лойиҳани ташкиллаштиришни ўз зиммамга олдим, бу лойиҳа Хитой Халқ Республикаси Раиси Си Цзиньпиннинг ‘Битта камар – битта йўл’ ташаббуси концепциясига ҳам тўлиқ мос келади. Концепциянинг асосий мақсади – глобал лойиҳа билан қамраб олинган барча 60 та мамлакат аҳолисининг турмуш даражасини яхшилаш ва фаровонлигини оширишдан иборат»- дейди Чжан Хунпин.
Санобар Саидова, Каттақўрғон, 75 ёшда:
«Операциядан ҳам, хитойлик врачларнинг муносабатларидан ҳам кўнглим тўлди. Кўриш қобилиятим аста-секинлик билан тикланишига ишонаман ва умид қиламан, врачлар бу жараён бирмунча муддат давом этади, деб айтишди».
Кимёхон Расулова, Юқори Чирчиқ тумани, 55 ёшда:
«Мен йигирма кун аввал битта кўзимни операция қилдиргандим. Кеча иккинчисини қилишди. Ҳозиргина кўзимдан боғични ечишди. Кўзим кўряпти. Бу 8 мартга жуда ажойиб совға бўлди».
«Мурувватда ёришган олам» хитой-ўзбек хайрия акцияси Шанхай ҳамкорлик ташкилоти раҳбарлигида, Ўзбекистон соғлиқни сақлаш вазирлиги, «Соғлом авлод учун» халқаро хайрия жамғармаси ташаббуси билан, «Xinjiang Asia-Europe International Material Trade Center Co., Ltd» компаниясининг ташкилий ва молиявий кўмаги остида ўтказилди.
Бахтиёр Насимов,
«Дарё» шарҳловчиси
Изоҳ (0)