Toshkent shahar hokimligi tomonidan joriy yilda nishonlanishi ko‘zda tutilgan tadbirlar rejasi ishlab chiqilgan, deya “Daryo”ga ma’lum qiladi hokimlik matbuot xizmati.
Xususan, mart oyida nishonlanuvchi bayram va tadbirlar bo‘yicha bir qancha chora tadbirlar ishlab chiqilgan. Quyida ushbu tadbirlar rejasi bilan tanishishingiz mumkin.
8-mart — Xalqaro xotin-qizlar kuni
8—10-mart kunlari Toshkentda O‘zbekiston mehmonxonasida qisqa metrajli film — ayollar uchun tabriklar namoyish etiladi. Ayiq animatorlari ko‘cha bo‘ylab ayollarni tabriklab, ularga tabriknoma va shirinliklar ulashadi.
Shu kuni qariyalar uyidagi ayollar uchun tabrik tadbirlari tashkil etish ko‘zda tutilgan.
Bundan tashqari, 80-yillar uslubida diskoteka o‘tkaziladi. Davlat xizmatchilari, blogerlar va mashhurlar tomonidan video tabrik taqdim etiladi.
21-mart — Navro‘z bayrami
21—24-mart kunlari barcha maydonlarda sumalak va halim tayyorlanadi, maydonlardan birida kechki sayr tashkil etiladi.
Turli joylardan bir vaqtning o‘zida ishga tushirish orqali uchar ilon festivalini o‘tkazish ham rejalashtirilgan. Bayramona kayfiyatni yaratish maqsadida yuzta milliy cholg‘u asboblari yordamida musiqiy parad bo‘lib o‘tadi. Joylarda milliy o‘yinlar o‘tkaziladi.
Poytaxtdagi Eko Parkda “Ulug‘vor O‘zbekiston” festivali o‘tkazilib, unda har bir tuman hokimlari mamlakatning bittadan viloyatini tavsiflab beradi. Bundan tashqari, milliy hunarmandchilik ko‘rgazmasi, non festivali o‘tkazilib, unda butun O‘zbekistondan keltirilgan non mahsulotlari namoyish etiladi.
DopPi Day
24-mart kuni do‘ppilar namoyish etiladigan DopPi Day tadbirini o‘tkazish taklif etilgan. Unda do‘ppilar tarixi, naqshlarining ma’nosi, do‘ppilar haqidagi she’r va qo‘shiqlar aytiladi. Shu kuni do‘ppi haqidagi eng qiziq hikoya tanlovi, Do‘ppi Dress-kod va Do‘ppi-shering ham o‘tkazish ko‘zda tutilgan.
Izoh (0)