Тошкент шаҳар ҳокимлиги томонидан жорий йилда нишонланиши кўзда тутилган тадбирлар режаси ишлаб чиқилган, дея «Дарё»га маълум қилади ҳокимлик матбуот хизмати.
Хусусан, март ойида нишонланувчи байрам ва тадбирлар бўйича бир қанча чора тадбирлар ишлаб чиқилган. Қуйида ушбу тадбирлар режаси билан танишишингиз мумкин.
8 март — Халқаро хотин-қизлар куни
8—10 март кунлари Тошкентда Ўзбекистон меҳмонхонасида қисқа метражли фильм — аёллар учун табриклар намойиш этилади. Айиқ аниматорлари кўча бўйлаб аёлларни табриклаб, уларга табрикнома ва ширинликлар улашади.
Шу куни қариялар уйидаги аёллар учун табрик тадбирлари ташкил этиш кўзда тутилган.
Бундан ташқари, 80 йиллар услубида дискотека ўтказилади. Давлат хизматчилари, блогерлар ва машҳурлар томонидан видео табрик тақдим этилади.
21 март — Наврўз байрами
21—24 март кунлари барча майдонларда сумалак ва ҳалим тайёрланади, майдонлардан бирида кечки сайр ташкил этилади.
Турли жойлардан бир вақтнинг ўзида ишга тушириш орқали учар илон фестивалини ўтказиш ҳам режалаштирилган. Байрамона кайфиятни яратиш мақсадида юзта миллий чолғу асбоблари ёрдамида мусиқий парад бўлиб ўтади. Жойларда миллий ўйинлар ўтказилади.
Пойтахтдаги Эко Паркда «Улуғвор Ўзбекистон» фестивали ўтказилиб, унда ҳар бир туман ҳокимлари мамлакатнинг биттадан вилоятини тавсифлаб беради. Бундан ташқари, миллий ҳунармандчилик кўргазмаси, нон фестивали ўтказилиб, унда бутун Ўзбекистондан келтирилган нон маҳсулотлари намойиш этилади.
Do‘pPi Day
24 март куни дўппилар намойиш этиладиган Do‘pPi Day тадбирини ўтказиш таклиф этилган. Унда дўппилар тарихи, нақшларининг маъноси, дўппилар ҳақидаги шеър ва қўшиқлар айтилади. Шу куни дўппи ҳақидаги энг қизиқ ҳикоя танлови, Do‘ppi Dress-kod ва Do‘ppi-shering ҳам ўтказиш кўзда тутилган.
Изоҳ (0)