Vazirlar Mahkamasining “O‘zbekiston Respublikasi Iqtisodiyot va sanoat vazirligi huzuridagi Tarmoq bozorlari va eksportga yo‘naltirilgan ishlab chiqarish tadqiqotlari markazi faoliyatini tashkil etish to‘g‘risida”gi qarori qabul qilindi.
Hujjatga muvofiq O‘zbekiston Prezidentining “Tovar bozorlarida savdoni yanada erkinlashtirish va raqobatni rivojlantirish chora-tadbirlari to‘g‘risida”gi 2018-yil 30-oktabrdagi farmoni bilan O‘zbekiston Iqtisodiyot va sanoat vazirligi huzurida Tarmoq bozorlari va eksportga yo‘naltirilgan ishlab chiqarish tadqiqotlari markazi tashkil etilgan. Quyidagilar markazning asosiy vazifalari etib belgilandi:
- O‘zbekistonda ishlab chiqariladigan va import qilinadigan mahsulotlar (tovarlar va xizmatlar) nomenklaturasi va turlari to‘g‘risida xo‘jalik yurituvchi subyektlarga axborot berish uchun muntazam yangilanib boriladigan elektron-axborot portalini yaratish;
- ichki ishlab chiqarish quvvatlari, tovarlarga bo‘lgan talab va taklifning hajmlari, shuningdek, ishlab chiqariladigan va iste’mol qilinadigan mahsulotlar ichki bozorda narxlarning o‘zgarishi haqidagi ma’lumotlar bazasini shakllantirish;
- tovar bozorlaridagi narxlar, talab va takliflarning o‘zgarishi dinamikasini tahlil va monitoring qilish hamda shu asosda tegishli takliflar tayyorlash;
- tarmoq bozorlari kon’yunkturasini O‘zbekiston va uning hududlari kesimida kompleks o‘rganish, ularning muvozanatli rivojlanishi to‘g‘risida takliflar tayyorlash.
- Markaz direktori O‘zbekiston iqtisodiyot va sanoat vaziri tomonidan lavozimga tayinlanadi va lavozimdan ozod etiladi;
- Markaz direktori maqomi, mehnatga haq to‘lash, tibbiy va transport xizmatlari sharoitlari bo‘yicha Iqtisodiyot va sanoat vazirligining departamenti boshlig‘iga tenglashtiriladi.
Vazirlik va xo‘jalik yurituvchi subyektlarning buyurtmalari bo‘yicha shartnoma asosida tovarlar va xizmatlar bozorini tadqiq etish borasida bajarilgan ishlar uchun olingan mablag‘lar hamda qonun hujjatlarida taqiqlanmagan boshqa manbalar byudjetdan tashqari Jamg‘armani shakllantirish manbalari etib belgilandi.
Davlat byudjetining mablag‘lari, byudjetdan tashqari Jamg‘armaning to‘lov asosida bajarilgan ishlar uchun olingan mablag‘lari, xalqaro moliya institutlari va xorijiy tashkilotlarning grantlari, shuningdek, qonun hujjatlari bilan taqiqlanmagan boshqa manbalar markazni moliyalashtirish manbalari etib belgilangan.
O‘zbekiston Iqtisodiyot vazirligi huzuridagi tugatilayotgan Tovar bozorlari konyunkturasini o‘rganish hamda investitsiya loyihalari va dasturlarini ekspertiza qilish respublika markazining asosiy vositalari, mulki va boshqa aktivlari, arxiv hamda boshqa hujjatlari yangi markazga berildi.
Izoh (0)