O‘zbekiston qonunchiligida 2025-yil 1-iyuldan bir qator o‘zgarish va yangiliklar kuchga kirdi. Quyida ushbu sanadan kuchga kirgan asosiy o‘zgarishlar taqdim etildi.
Pensiya va nafaqalar miqdori 10 foizga oshdi
Bunda:
- yoshga doir eng kam pensiya miqdori — oyiga 918 000 so‘m;
- nogironlik pensiyalarining eng kam miqdori — oyiga 1 012 000 so‘m;
- kam ta’minlangan oilalarga bolalar nafaqasining har oylik miqdori:
- 3 yoshgacha bo‘lgan bitta kichik farzandi uchun — 360 000 so‘m, 3 yoshdan 18 yoshgacha bo‘lgan bitta farzandi uchun — 275 000 so‘m;
- oilaning ikkinchi farzandi uchun qo‘shimcha — 165 000 so‘m;
- oilaning uchinchi va undan keyingi har bir farzandi uchun qo‘shimcha — 110 000 so‘m;
- kam ta’minlangan oilalar uchun moddiy yordamning oylik miqdori – 420 000 so‘m bo‘ldi.
Ayrim shifokorlarga ustamalar to‘lanadi
respublikaning barcha davlat tibbiyot muassasalarida maxsus ko‘nikmalarni talab qiladigan davolash choralarini ko‘rgan hamda yuqori xavf darajasiga ega bo‘lgan amaliyotlarni samarali amalga oshirgan shifokorlarning oylik maoshlariga 25 foizdan 100 foizgacha ustama to‘lanadi.
Sog‘liqni saqlash tizimini tashkil etishning yangi modeli joriy etildi
Respublikaning 15 ta tuman (shahar)larida, tajriba-sinov tariqasida sog‘liqni saqlash tizimini tashkil etishning yangi modeli joriy etiladi. Bunda quyidagi maqsadlar belgilandi, jumladan:
- oilaviy poliklinikalarda ko‘rsatiladigan tibbiy xizmatlar sifat va samaradorligini oshirish;
- tibbiyot xodimlarining bilim va malakasini oshirish, ular mehnatiga munosib haq to‘lash tizimini joriy qilish;
- aholiga tibbiy xizmat ko‘rsatishda qisqa muddatli chora-tadbirlarni o‘z ichiga olgan “Tibbiyotda 90 kunlik o‘zgarishlar” dasturini amalga oshirish.
Uy-joy sotib olishda “eskrou” tizimi joriy etildi
Bu quruvchi va xaridor o‘rtasidagi oldi-sotdining yangicha shakli. Endilikda, hali bitmagan uydan kvartira sotib olmoqchi bo‘lgan fuqaro, o‘sha uyga o‘z mablag‘larini tikish orqali ulushdorga aylanadi. Buning uchun quruvchi, ya’ni developerning o‘ziga emas, bankka to‘lov qiladi. Ulushdorning to‘lagan pullari alohida “eskrou” hisobvarag‘ida yig‘ilib boriladi. Uy bitmaguncha quruvchi kompaniya bu pullardan foydalana olmaydi. Turar joyni esa o‘z mablag‘lari yoki bank krediti asosida qurib bitkazadi.
1-iyuldan kuchga kirgan tartib joriy yil oxirigacha ixtiyoriy bo‘ladi. 2026-yil 1-yanvardan esa qurilishda mablag‘larini jalb qilish faqat eskrou hisobvarag‘i orqali amalga oshiriladi.
Energiya samaradorligini oshirish rag‘batlantiriladi
Aholi uy-joylarining energiya auditini o‘tkazish xarajatlari hamda quyosh panellari va geliokollektorlar qiymatining 20 foizi va issiqlik nasoslari qiymatining 40 foizini qoplash uchun Energiya samaradorligi milliy agentligi tomonidan subsidiya ajratiladi. Biroq ushbu miqdorlar BHMning 50 baravaridan oshmagan qiymatda qoplanadi.
Ayrim shaxslarga QQS bir ish kunida qaytariladi
“Ijtimoiy himoya yagona reyestri” hamda “Kambag‘al oilalar reyestri”ga kiritilgan shaxslarga belgilangan tovarlar (xizmatlar)ni xarid qilishda to‘langan QQS summasi 1 ish kunida qaytariladi.
Birinchi marta huquqbuzarlik sodir etgan tadbirkor javobgarlikdan ozod etiladi
2028-yil 1-yanvargacha “Birinchi imkoniyat” tamoyili joriy etildi. Bunda birinchi faoliyat yili davomida savdo va tadbirkorlik sohalariga oid ma’muriy huquqbuzarlikni ilk bor sodir etgan kichik tadbirkorlik subyektlari ma’muriy javobgarlikdan ozod etiladi.
Tadbirkorlarga yangi majburiyatlar yuklaydigan normalarni qabul qilishga moratoriy kuchga kirdi
2028-yil 1-yanvargacha kichik va o‘rta biznes subyektlari zimmasiga yangi majburiyatlar yuklatadigan normativ-huquqiy hujjatlarni qabul qilishga moratoriy e’lon qilindi.
Shuningdek, tadbirkorlarga yangi tartibga solish vositalarini belgilovchi yoki amaldagilarini kuchaytiruvchi normativ-huquqiy hujjatlarga nisbatan “yagona sanadan yangi qoidalar” tamoyili qo‘llanadi va ushbu normalarning kuchga kirish sanasi 1-yanvar yoki 1-iyul etib belgilanadi.
Ayrim ekofaol fuqarolarga subsidiya beriladi
“Ekofaol fuqaro” platformasiga o‘zi ekkan daraxti to‘g‘risida ma’lumotlar kiritgan kambag‘al oilalar a’zolariga o‘rmon fondi yerlarida ekilgan har 100 ta daraxt uchun BHMning 1 baravari miqdorida subsidiya ajratiladi.
Bunda subsidiya yil davomida 2 ga bo‘lib (ko‘chatlar ekilgan vaqtda hamda ularni parvarishlash davridan keyin) teng ulushlarda to‘lanadi.
Yangi tashkil etiladigan ta’lim tashkilotlari faoliyati ikki bosqichda yo‘lga qo‘yiladi
1-bosqichda faoliyatni boshlash uchun o‘rta maxsus, kasbiy, oliy va oliy ta’limdan keyingi ta’lim tashkilotlari o‘rnatilgan tartibda lisenziyalanadi, kadrlarni qayta tayyorlash va ularning malakasini oshirish ta’lim tashkilotlari xabardor qilish tartibida tashkil etiladi;
2-bosqichda ta’lim tashkilotlarining kadrlar tayyorlash yo‘lga qo‘yiladigan ta’lim dasturlari maxsus davlat akkreditatsiyasidan o‘tkaziladi.
Bunda maxsus davlat akkreditatsiyasidan o‘tmasdan qabul jarayonini amalga oshirish lisenziya talab va shartlarini qo‘pol ravishda buzish deb baholanadi va ta’lim tashkilotiga berilgan lisenziyaning bekor qilinishiga asos bo‘ladi.
Malaka oshirishning yangi shakli joriy etildi
Davlat siyosati va boshqaruvi akademiyasi davlat organlari va tashkilotlari tomonidan davlat xizmatchilari malakasini oshirish va qayta tayyorlash xodimlarning kasbiy rivojlanish ehtiyojlariga asoslangan holda tashkil etiladi. Shuningdek, malaka oshirishning an’anaviy, muqobil va mustaqil shakllari joriy etildi.
Bolalar uchun kontent yaratgan shaxslarga soliq imtiyozi beriladi
2030-yil 1-yanvargacha yuridik shaxslar, shuningdek, Bolalar kontentini rivojlantirish markazining bolalar uchun kontentlar yaratishdan olgan daromadi jami yillik daromadining kamida 80 foizini tashkil etganda ularga quyidagi imtiyozlar berildi:
- foyda solig‘i to‘lashdan ozod qilinadi;
- ijtimoiy soliqni 1 foiz miqdorida to‘laydi.
Nogironlik pensiyalari proaktiv shaklda tayinlanadi
Davlat pensiyalari va kompensatsiyalarni tayinlashning soddalashtirilgan tartibi joriy etildi. Bunda fuqarolarga I yoki II guruh nogironligi belgilanganda pensiyalar alohida murojaat talab etmasdan proaktiv shaklda tayinlanadi.
Shuningdek, fuqaroga proaktiv shaklda tayinlangan pensiyalarni rad qilish huquqi berildi.
Jonli ijro haftaligi o‘tkaziladi
Jonli ijroda tashkil etiladigan konsert-tomosha tadbirlari bo‘yicha reklamalarni O‘zbekiston MTRK tizimidagi teleradiokanallarda efirga berish uchun tadbir tashkilotchisiga 30 foiz miqdorida chegirma beriladi.
Shuningdek, har chorakda respublikaning barcha hududlarida Jonli ijro haftaligi o‘tkaziladi.
Izoh (0)