O‘zbekiston harbiylari Ugom-Chotqol tog‘ tizmasida murakkab mashqlarni bajardi (foto va video)

Mudofaa vazirligi tog‘ tayyorgarligi o‘quv mashqlari markazida navbatdagi 45 kunlik o‘quv-yig‘in mashg‘ulotlari o‘tkazildi. Yig‘inning 70—80 foizi amaliy mashg‘ulotlardan iborat bo‘lib, o‘ta murakkab mashqlar real vaziyatlarga yaqinlashtirilgan holda olib borildi, deb xabar beradi vazirlik matbuot xizmati.

“Ob-havo injiqliklari Ugom-Chotqol tog‘ tizmasida o‘tkazilgan amaliy mashqlarga yanayam noqulay holatlarni keltirdi. Kunduzi harorat 4—6 daraja sovuq, tunggi paytlarda esa 20 darajagacha pasaydi. Ana shunday ob-havo sharoiti, buning ustiga tizzadan oshadigan qorda harakatlanish harbiy xizmatchilarning jismoniy va ruhiy tayyorgarligini tekshirish uchun jiddiy sinovga aylandi”, — deyiladi xabarda.

Mashg‘ulotlar davomida harbiy xizmatchilar chang‘i va otish tayyorgarligi, tog‘li hududda daryo, jarlik, qoyalar va shu kabi to‘siqlardan oshib o‘tishda bir qator usul va uslublardan foydalandi. Yig‘in davomida ular tabiiy tog‘ to‘siqlaridan o‘tish mashqini bajardi.

Dengiz sathidan 2500—3000 metr balanlikdagi tog‘ cho‘qqilarida shartli qurollangan jangarilar guruhini aniqlash va yo‘q qilish mavzusida taktik o‘quvlari o‘tkazildi.